અરવલ્લી RTOમાં ટેસ્ટ ટ્રેકની સુવિધા છતા લોકોને હાલાકી

અરવલ્લી: જિલ્લાની પ્રાદેશિક વાહન વ્યવહાર કચેરીમાં લાયસન્સ કઢાવવા માટે ટેસ્ટ ટ્રેક ચાલુ ન થતા લોકોને હાલાકીનો સામનો કરવો પડી રહ્યો છે.

જિલ્લાની રચના થયા બાદ પ્રાદેશિક વાહન વ્યવહાર કચેરીનું નિર્માણ કરવામાં આવ્યું છે. અરજદારોને કાચું લાયસન્સ તો જિલ્લા પ્રદેશિક કચેરીમાં ઈસ્યુ થઈ જાય છે પરંતુ વાહન ટેસ્ટ આપવા માટે 50 કિલોમીટર સુુધી દૂર હિંમતનગર સુધી જવું પડે છે. જેના કારણે લોકોને નાણાં અને સમય બંનેનો વ્યય થાય છે.

રોજના 40થી 50 અરજદારો લાયસન્સ માટે અરજી કરે છે. જેમને લાયસન્સ માટે સાબરકાંઠા જિલ્લામાં જવું પડે છે. આ માટે જિલ્લામાં વ્યવહાર કચેરીના અધિકારીઓએ પણ ઉચ્ચ કક્ષાએ રજૂઆત કરી છે. ત્યારે લોકોની માંગ છે કે જિલ્લામાં વાહન ટેસ્ટ આપવા માટેનો ટ્રેક શરૂ કરવામાં આવે.