- શામળાજી પોલીસે ઝડપ્યો વિદેશી દારૂ
- ટ્રક ચાલક ટ્રક છોડી ભાગ્યો
- 6.12 લાખ રૂપિયાનો વિદેશી દારૂ મળ્યો
અરવલ્લી : અરવલ્લી જિલ્લામાં શુક્રવારના રોજ શામળાજી પી.એસ.આઇ અનંત દેસાઈ અને તેમની ટીમે અણસોલ ગામની સીમમાં વોચ ગોઠવી હતી. રાજસ્થાનથી આવતા વાહનોનું સઘન ચેકીંગ ચાલી રહ્યું હતું. આ દરમ્યાન એક ટ્રક ચાલક અચાનક ટ્રક મૂકી ફરાર થઇ ગયો હતો. પોલીસે બીનવારસી ટ્રકની તલાશી લેતા તેમાં તૂટેલા કેરેટની આડમાં રાખેલ વિદેશી દારૂ મળી આવ્યો હતો.
દારૂની 2040 બોટલ મળી આવી
પોલીસને ટ્રક માંથી રૂપિયા 6,12,000 રૂપિયાની કિંમતનો ભારતીય બનાવટની વિદેશી દારૂની 2040 બોટલ મળી આવી હતી. પોલીસે ટ્રકની કીંમત રૂપિયા 7 લાખ મળી કુલ રૂપિયા 13.12 લાખનો મુદ્દામાલ જપ્ત કર્યો હતો. આ ઉપરાંત અજાણ્યા ટ્રક ચાલક વિરુદ્ધ પ્રોહીબીશન એક્ટ હેઠળ ગુનો નોંધી કાયદેસરની કાર્યવાહી હાથ ધરી છે. જ્યારે ફરાર ટ્રક ચાલકને ઝડપી પાડવા ચક્રો ગતિમાન કર્યાં હતા.