સ્વચ્છ ભારત પર પ્રશ્નાર્થ, બાયડ તાલુકા પંચાયતના પરિસરમાં ગંદકીનું સામ્રાજ્ય

અરવલ્લી: ગાંધીજીના સ્વચ્છ ભારતની આશાને સરકાર માત્ર ભાષણ અને યોજનાઓ પૂરતી સિમિત રાખી હોય તેવું લાગી રહ્યું છે. બાયડ તાલુકા પંચાયત કચેરીના પરિસરમાં જ સ્વચ્છતા અભિયાનના લીરે લીરા ઉડાડી રહ્યા હોય તેમ ઠેર ઠેર ગંદકી અને વરસાદી પાણીનો ભરાવો થયો છે.

સ્વચ્છતા અભિયાનની મોટી મોટી વાતુ કરનાર સરકાર ઘણીવાર સ્વચ્છતા પાછળ કાર્ય થાય છે કે નહિં તે જોતી નથી. તાજેતરમાં વરસાદી માહોલને કારણે પાણી ભરાવાની સમસ્યા બધે જ જોવા મળે છે. ત્યારે બાયડના તાલુકા પંચાયતમાં વરસાદી પાણીને કારણે પાણીનો ભરાવો થયો હતો. ગંદકીના કારણે તાલુકા પંચાયત કચેરીમાં કામકાજ અર્થે આવતા અરજદારો ત્રાહિમામ પોકારી ઉઠ્યા છે. તાલુકા પંચાયતના પરિસરમાં વરસાદી પાણીનો જમાવડો થતાં મચ્છરોના ઉપદ્રવથી આજુબાજુના રહેણાંક વિસ્તારમાં રોગચાળો ફેલાવાની ભીતિ જોવા મળી છે.

સ્વચ્છ ભારત પર પ્રશ્નાર્થ, બાયડના તાલુકા પંચાયતના પરિસરમાં ગંદકીનું સામ્રાજ્ય

બાયડ તાલુકા પંચાયતના સત્તાધીશો અને તાલુકા વિકાસ અધિકારી આ અંગે ઉદાસીન વલણ ધરાવતા હોય તેવું લાગી રહ્યું છે. રોગચાળાને લીધે 20થી વધુ લોકો શંકાસ્પદ ડેન્ગ્યુનો ભોગ બન્યા છે. પરિસરમાં સફાઇ કરવામાં આવે તેવી પંચાયત કચેરીની આસપાસ આવેલી રહેણાંક વિસ્તારોના રહિશોની માંગ છે.