અરવલ્લીઃ સંભવિત નિસર્ગ વાવાઝોડાની આગાહીના પગલે રાજ્ય ભરમાં 6 જૂન સુધી ટેકાના ભાવે ઘઉંની ખરીદી મુલતવી રાખવાનો નિર્ણય કરવામાં આવ્યો છે. એકબાજુ ચોમાસુ દસ્તક દઈ રહ્યું છે, બીજી બાજુ ટેકાના ભાવે ખેત પેદાશોની ખરીદી મુલતવી રાખવાના નિર્ણય કરવામાં આવતા ખેડૂતોની મુશ્કેલીમાં વધારો થયો છે.
અરવલ્લી જિલ્લાના મોડાસામાં સરકાર દ્વારા ટેકા ભાવે ઘઉંની ખરીદી પાંચમી વખત બંધ કરવામાં આવી છે. ઘઉંની ખરીદી 20 માર્ચના રોજ શરૂ કરવામાં આવી હતી. જો કે, 24 માર્ચે લોકડાઉન જાહેર થતા ખરીદી બંધ કરવામાં આવી હતી. ત્યાર બાદ ઘઉંની ખરીદી 27 એપ્રિલે પુન:શરૂ કરવામાં આવી હતી. પરંતુ 7 મેના રોજ ગોડાઉનવાળા વિસ્તારમાં કોરોનાનો કેસ આવતા આવતા 14 દિવસ સુધી મુલતવી રાખવાનો આદેશ કરવામાં આવ્યો હતો. જે બાદ 20 મેના રોજ ફરીથી ખરીદી શરૂ કરવામાં આવી હતી. જે હવે નિર્સગ વાવાઝોડાની આશંકાને કારણે બંધ કરવામાં આવી છે.
