ધર્મજ નકલી બેન્ક કાંડનું આરોપી દંપતી ઝડપાયું, વિદ્યાનગરમાં પણ કરી હતી લાખોની છેતરપિંડી

પેટલાદ તાલુકાના ધર્મજ ગામમાં મહેન્દ્રા કોટક સિક્યુરિટીના નામે ફ્રેન્ચાઈઝી ખોલીને ગ્રામજનો પાસેથી ડિપોઝિટ ઉઘરાવીને લાખો રૂપિયાનું ફુલેકું ફેરવનારા "બંટી બબલી"ને સાત મહિના પછી મહેસાણાની એક હોટલમાંથી ઝડપી પાડવામાં આવ્યા છે. આ બંટી-બબલીએ વિદ્યાનગરમાં પણ ઓફિસ ખોલીને બે વ્યક્તિઓને 11 લાખનો ચુનો લગાવ્યો હોવાની હકીકત સામે આવી છે. આ અંગે વિદ્યાનગર પોલીસે ગુનો નોંધી તપાસ હાથ ધરી છે.

આણંદ: મળતી માહિતી મુજબ આણંદના નિવૃત્ત શિક્ષક મહેન્દ્રભાઇએ 2007માં શેરબજારનું ટ્રેડીંગ કરવા માટે સિક્યુરિટી એજન્સીમાં ડીમેટ એકાઉન્ટ ખોલાવ્યું હતુ. દરમિયાન 2010-11માં આણંદ ખાતેની ઓફિસ બંધ થઈ જતાં કંપનીએ તેમની જાણ બહાર બોરસદ ખાતે તેમનું એકાઉન્ટ ટ્રાન્સફર કર્યું હતું. 2019ના માર્ચ મહિનામાં સુચિત નામના શખ્સે મહેન્દ્ર ભાઈને ફોન કરીને જણાવ્યું કે, તમારું એકાઉન્ટ બોરસદ શાખામાંથી મળ્યું છે અને હવે તમારે શેરબજાર સંબંધી જે પણ કામ હોય તો આ મોબાઈલ ફોન પર સંપર્ક કરવાનો રહેશે. મહેન્દ્રભાઈએ તે મોબાઈલ નંબર પર સંપર્ક કરીને તેમની વિદ્યાનગરના નાના બજારમાં આવેલી ઓફિસે મળવા ગયા હતા. જ્યાં હાજર શખ્સે પોતાનું નામ સુચિત અને મહિલાએ મયુરીબેન જણાવ્યું હતુ.

નકલી બેન્ક કાંડનું આરોપી દંપતી ઝડપાયું

બન્નેએ મહેન્દ્રભાઈને એક ખાનગી કંપનીમાં ફાયનાન્સ પર 10 લાખથી વધુનું રોકાણ કરશો તો સાડા બાર ટકા વ્યાજ મળશે તેવી લાલચ આપી હતી. મહેન્દ્રભાઈએ પૈસાની ખાતરી માંગતા બન્નેએ આ કહ્યું, "આ લીસ્ટેડ કંપની છે, તેમાં હજારો પ્રતિષ્ઠિત વ્યક્તિઓના ખાતા આવેલા છે. તેમ ભરોસોમાં લીધા બાદ મહેન્દ્રભાઈ તેમની વાતોમાં આવી જતા દશ લાખનો ચેક આપ્યો હતો. પ્રથમ મહિને તેમના ખાતામાં વ્યાજ જમા થયું હતું. ત્યારબાદ સ્કીમ મુજબ હવે દર ત્રણ મહિને વ્યાજ જમા થશે તેમ જણાવ્યું હતુ. મહેન્દ્રભાઈએ તેમની પાસે પોલિસીની માંગણી કરતા એક વ્યક્તિ તેમના ઘરે કવરમાં પોલિસી આપી ગયો હતો. જેના પર શંકા જતાં મહેન્દ્રભાઇએ અમદાવાદ ખાતે આવેલી કંપનીની ઓફિસમાં સંપર્ક કર્યો હતો. ત્યારે જાણવા મળ્યું કે, તેમના દ્વારા આવી કોઈ સ્કીમ ચલાવવામાં આવતી નથી. જેથી મહેન્દ્રભાઈએ ફોન પર સુચિતનો સંપર્ક કરતાં તેણે પૈસા પરત આપી દેવાનું જણાવ્યું હતુ. ઓફિસે તપાસ કરતાં ત્યાં તાળા વાગી ગયા હતા. ત્યારબાદ મોબાઈલ ફોન પણ સ્વીચ ઓફ થઇ ગયો હતો.દરમિયાન પેટલાદ પોલીસે દક્ષ ઉર્ફે પીન્કો ઉર્ફે દર્શન મહેશભાઈ પંચાલ અને મયુરીબેન દર્શનભાઈ પંચાલને ઝડપી પાડ્યા હતા. તેની જાણ મહેન્દ્રભાઈને થતા તેઓ સાથે થયેલી છેતરપીંડી કરનારા આ બન્નેનો ભાંડો ફૂટી ગયો હતો. તેમની પાસે ઠગાઈ કરનારા આ જ બે વ્યક્તિઓ છે તેમ જાણ થઇ હતી. તપાસ કરતાં આ બન્નેએ વિપુલભાઈ પાસેથી ડીમેટ એકાઉન્ટ ખોલાવવાની ડિપોઝિટ પેટે એક લાખ રૂપિયા પડાવ્યા હતા. જેથી બન્ને વિદ્યાનગર પોલીસ મથકે આવ્યા હતા અને પોતાની ફરિયાદ નોંધાવી હતી.

કયારથી શરૂ કર્યું હતું દંપતિએ છેંતરપીંડીનું ફુલેકુ

માહિતી મુજબ આ બન્ને બંટી બબલી વર્ષ 2009થી આ રીતની પ્રવૃત્તિઓ સાથે સંકળાયેલા હતા. જેમના પર વર્ષ 2017માં વાડજ પોલિસ મથકમાં, વર્ષ 2018માં માણસા પોલીસ મથકે, વર્ષ 2020માં વિદ્યાનગર પોલીસ મથકે, વર્ષ 2020માં પેટલાદ રૂરલ પોલીસ મથકે આ દંપતિ વિરુદ્ધ ગુનાઓ નોંધાઇ ચુક્યા છે. જેમાં તે વોન્ટેડ જાહેર કરવામાં આવ્યા હતા. ત્યારે ધર્મજમાં નકલી બેન્ક ખોલનારા આ દંપતિને પેટલાદ પોલીસે ઝડપી પીડ્યું હતું.

દંપતીનો ગુનાહીત પ્રવૃતિનો ટ્રેક રેકોર્ડ

• આરોપી દંપતી છેલ્લા ઘણા વર્ષોથી પોતાની ઓળખ બદલી નાગરિકોને છેતરવાની પ્રવૃત્તિ કરતા હતા
• અમદાવાદ, વાડજ, વિદ્યાનગર, માણસા, પેટલાદ વગેરે પોલીસ સ્ટેશનમા છેતરપિંડીના ગુનામાં ફરાર હતા અને સાત જેટલા અન્ય ગુનામાં વોન્ટેડ જાહેર કરાયા હતા
• આ દંપતિ મૂળ અમદાવાદના નિર્ણય નગરના રહેવાસી હતા તથા ઊંઝાના શ્યામવિહાર ફ્લેટના પણ રહેઠાણના પુરાવા બનાવી લોકોને છેતરતા હતા
• આ ગુનાનો માસ્ટર માઈન્ડ અનેક ઓળખ બદલી ચૂકયો છે. જેમાં દક્ષ ઉર્ફે પિંન્કુ ઉર્ફે દર્શન પંચાલ, ઉર્ફે કનક શાહ, ઉર્ફે શ્રેયસ ઉપાધ્યાય વગેરે નામ ધારણ કરી તેની કહેવાતી પત્ની મયુરી પણ આ પ્રવૃત્તિઓમાં નવો વેશ ધારણ કરી તેની મદદ કરતી હતી.