માંડલ-વિરમગામ તાલુકાને અતિવૃષ્ટિ પાક સહાયમાંથી બાકાત રખાતા ખેડૂતોમાં રોષ

માંડલ તેમજ વિરમગામ તાલુકાને અતિવૃષ્ટિની પાક સહાયમાંથી બાકાત રાખવામાં આવતા ખેડૂતોમાં ભારે રોષ જોવા મળ્યો હતો. જે અંગે ધારાસભ્ય લાખાભાઈ ભરવાડ, પૂર્વ ધારાસભ્ય તેજશ્રીબેન પટેલ તેમજ જિલ્લા ભાજપ પ્રમુખ દ્વારા કૃષિપ્રધાન આર સી ફળદુને રજૂઆત કરવામાં આવી હતી.

અમદાવાદ: અમદાવાદ જિલ્લાના વિરમગામ તાલુકામાં ભારે વરસાદના કારણે આ વર્ષે ખેડૂતોને પાકમાં મોટું નુકશાન થયું છે. જેથી રાજ્ય સરકારે વિધાનસભા ગૃહમાં 3700 કરોડની ગ્રાન્ટ ખેડૂતો માટે મંજૂર કરી હતી. સહાય માટે ગુજરાત સરકાર દ્વારા અમદાવાદ જિલ્લાના કેટલાક તાલુકાઓમાં અતિવૃષ્ટિ જાહેર કરવામાં આવી હતી. પરંતુ તેમાં માંડલ તેમજ વિરમગામ તાલુકાને બાકાત રાખવામાં આવ્યો હતો.

માંડલ-વિરમગામ તાલુકાને અતિવૃષ્ટિ પાક સહાયમાંથી બાકાત રખાતા ખેડૂતોમાં રોષ

માંડલ અને વિરમગામ તાલુકામાં દેત્રોજ તાલુકા કરતાં પણ વધારે વરસાદ પડ્યો હતો અને 70 થી 80 ટકા ખેડૂતોનો પાક નિષ્ફળ ગયો હતો. આથી આ ખેડૂતોને પાકનું વળતર મળે અને બંને તાલુકાઓને સહાયમાં સમાવિષ્ટ કરાય તે માટે વિસ્તારના ધારાસભ્ય લાખાભાઈ ભરવાડ દ્વારા કૃષિપ્રધાન આર.સી.ફળદુને પત્ર લખીને રજૂઆત કરવામાં આવી હતી તેમજ પૂર્વ ધારાસભ્ય તેજશ્રીબેન પટેલ દ્વારા પણ કૃષિમંત્રીને પત્ર લખી રજૂઆત કરવામાં આવી હતી. માંડલના ભાજપ પ્રમુખ કૃષિપ્રધાન આર સી ફળદુને રૂબરૂ મળવા પણ ગયા હતા.માંડલ-વિરમગામને અતિવૃષ્ટિ તાલુકામાં સમાવેશ ન કરતા માંડલ અને વિરમગામ તાલુકાના ખેડૂતોમાં રોષ ફાટી નીકળ્યો છે અને જો ખેડૂતોને વળતર ન મળે તો આવનારી ચૂંટણીઓમાં સરકારને નુકસાન ભોગવવું પડશે અને કેટલાંક આગેવાનોએ રાજીનામું આપવાની ચીમકી પણ ઉચ્ચારી છે.