અમદાવાદ: આજ રોજ ધોરણ 12 કોમર્સનું પરિણામ ગુજરાત બોર્ડ દ્વારા જાહેર કરાયું છે. સમગ્ર ગુજરાત બોર્ડમાં ટોપ 10 માં 5 વિદ્યાર્થીઓએ સ્થાન મેળવ્યું હતું. તથા A1 ગ્રેડ મેળવનાર 26 વિદ્યાર્થીઓ અને A2 ગ્રેડ મેળવનાર 66 વિદ્યાર્થીઓ રહ્યા છે. જેમાં 4 વિદ્યાર્થીનીઓએ પરિણામમાં ઝળહળતી સફળતા મેળવી છે.
1. ઝાલા રાજવી - 99.98 PR
રાજકોટ: ગોંડલની ગંગોત્રી સ્કૂલમાં અભ્યાસ કરતી ઝાલા રાજવી એક સામાન્ય પરિવારની દીકરી છે. તેના પિતા કોટડાસાંગાણીમાં ફ્રૂટ વેચીને પોતાનું ગુજરાન ચલાવે છે. અભ્યાસમાં પહેલેથી જ તેજસ્વી એવી ઝાલા રાજવીના ઘરની આર્થિક પરિસ્થિતિ સામાન્ય છે. ઝાલા રાજવીએ ધોરણ-12માં નિયમિત 9થી 10 કલાકની તનતોડ મહેનત કરી છે. ત્યારે મહેનતુ દીકરીએ આજે આવું ઉત્તમ પરિણામ મેળવી તેમણે પોતાના પિતાના સ્વપ્નને સાચા અર્થમાં સાર્થક કરી શ્રેષ્ઠ નામ કરી બતાવ્યું છે.
2. અકબરી ક્રિષા - 99.98 PR
જામનગર: મોદી સ્કૂલની અકબરી ક્રિષા બોર્ડમાં બીજા નંબરે આવી છે. શાળાના મેનેજમેન્ટ સ્ટાફ દ્વારા રેગ્યુલર ફોલોઅપ, વિદ્યાર્થીઓનું કાઉન્સેલિંગ તથા કારકીર્દી માર્ગદર્શન અને આત્મવિશ્વાસ વધારી અને આત્મનિર્ભર બનાવવા પ્રયત્ન કરવામાં આવે છે. અકબરી ક્રિશ્નાએ જણાવ્યું કે તેઓ રોજ 8 થી 10 કલાકનો વાંચન કરતી હતી અને સ્કૂલની તમામ ટેસ્ટમાં હાજર રહેતી હતી સાથે સાથે પરિવારજનો દ્વારા પણ તેમને પૂરો સપોર્ટ આપવામાં આવ્યો છે. જેના કારણે તેમને આ સિદ્ધિ મળી છે.
3. મહેક ગુપ્તા - 99.93 PR
રાજકોટ: મોદી સ્કૂલમાં અભ્યાસ કરતી મહેક ગુપ્તા નામની વિદ્યાર્થીનીને ધોરણ 12 માં 99.93 આવ્યા છે. મહેકના પિતા રાજકોટમાં પાણીપુરીની લારી ચલાવે છે. એવામાં પાણીપુરીની લારી ચલાવતા પિતાની પુત્રીને ધોરણ 12 માં 99.93 આવતા તેના પરિવારજનોમાં ખુશીનો માહોલ છવાયો છે. તેણે જણાવ્યું કે હું દરરોજ છ થી સાત કલાકનું વાંચન કરતી હતી. જ્યારે હું અભ્યાસ કરતી હોવ ત્યારે મારા ફેમિલીનો ખુબ જ સપોર્ટ રહેતો હતો. મારે ભવિષ્યમાં સીએ બનવાની આશા છે. જેના માટે હું મહેનત કરીશ.
4. હસ્તી જાસોલિયા - 99.86 PR
ભાવનગર: ભાવનગરની સરદાર નગર ગુરુકુળની રત્ન કલાકારની દીકરીએ એ વન ગ્રેડ પ્રાપ્ત કર્યો છે. દાદાના માર્ગદર્શન નીચે અને શિક્ષકોની મહેનતને પગલે ટકાવારી મેળવવામાં સફળ રહી છે. આગામી દિવસોમાં તે આઈ ટી સેક્ટરમાં જવાની વિચારણા કરી રહી છે.
- HSC Result 2023 : અમદાવાદની દેવાંશી ડાભીએ વિના ટ્યૂશને મેળવ્યો એ વન ગ્રેડ, ફક્ત શાળા શિક્ષણથી સફળતા મેળવી
- HSC Result 2023 : જૂનાગઢમાં કેન્સર ગ્રસ્ત પિતાએ ઉધાર પૈસા લઇને પુત્રીને ભણાવી, પુત્રીએ ધોરણ 12માં 99.63 પીઆર મેળવ્યા
- HSC Result 2023 : સુરતમાં આંગણવાડી કાર્યકર્તાની દીકરીની મહેનત રંગ લાવી, શાળાએ લીધો ખૂબ સરસ નિર્ણય
