અમદાવાદ : શહેરમાં ગુંડા તત્વોનું જાણે રાજ ચાલી રહ્યું હોય તેવી ઘટનાઓ સામે આવી રહી છે. કારણકે અમદાવાદની સુરક્ષા અને સલામતી કરતી પોલીસ પર પણ સવાલો ઉભા થઇ રહ્યા છે. જ્યાં શાહપુરમાં બે જૂથ વચ્ચે પથ્થરમારાની ઘટના બાદ પોલીસે મામલો માળ થાળે પાડ્યો, તો ત્યાં જ દિલ્હી દરવાજા પાસે ફાયરિંગની ઘટના સામે આવી હતી. જ્યાં કિન્નરો વચ્ચેની ગેંગવૉરમાં ફાયરિંગ કરવામાં આવ્યું હોવાનું સામે આવ્યું હતું. આ મામલે ક્રાઇમ બ્રાન્ચે નીતૂ દે નામના કિન્નરની અટકાયત કરી આગળની વધુ તપાસ હાથ ધરી છે.
આ અંગે પ્રાપ્ત વિગતો મુજબ, ભાવના દે અને નીતુ દેની કિન્નર ગેંગ વચ્ચે છેલ્લા ઘણાં સમયથી રૂપિયા ઉઘરાવવાની બાબતે વિવાદ ચાલી રહ્યો છે. આ વિવાદમાં આજે ગુરૂવારની રાત્રે દિલ્હી દરવાજા પાસે કિન્નર નીતુ દેએ ફાયરિંગ કર્યું હતું. હાલ ક્રાઈમ બ્રાન્ચે નીતુ દેની અટકાયત કરી છે. નીતુ દે અને ભાવના દેની ગેંગ વચ્ચે ચાલતી દુશ્મનાવટ મામલે સરખેજ અને વસ્ત્રાપુર પોલીસ સ્ટેશનમાં અગાઉ પણ ગુના નોંધાયા છે.
