અમદાવાદ : અમદાવાદ શહેરના પૂર્વ વિસ્તારમાં ફરી એક વખત ગુનેગારો બેફામ બન્યા હોય અને પોલીસનો કે કાયદાનો ડર ન હોય તે પ્રકારની ઘટના સામે આવી છે. રખિયાલ વિસ્તારમાં આવેલી કાશીબાઈની ચાલીના ગેટ ઉપર મોડી રાત્રે એક આધેડ પર ફાયરિંગ કરીને હત્યાનો પ્રયાસ કરાયો હોવાની ઘટના સામે આવી છે. જે મામલે રખિયાલ પોલીસ મથકે ફરિયાદ નોંધાઇ છે.
શું બન્યું હતું : ગોમતીપુરમાં આવેલી કાશીબાઈની ચાલીમાં રહેતા નાસીર હુસેન શેખ પર ફાયરિંગ કરીને હત્યાનો પ્રયાસ કરાયો હોવાની ઘટના બની છે. જેમાં 22મી જાન્યુઆરી 2023 ના રોજ તેઓ પોતાના મિત્રની દીકરીની સગાઈનો પ્રસંગ હોય તેની તૈયારી માટે મોડે રાત સુધી ત્યાં હાજર હતા. નાસિર હુસેન રાત્રે અઢી વાગે આસપાસ ચાલીમાં રહેતા મિત્રો સાથે ચાલીના નાકે ફૂટપાથ ઉપર તાપણી કરી રહ્યા હતા. તે સમયે અકબરનગરના છાપરામાં રહેતો ફઝલ અહેમદ શેખ અને તેનો ભાઈ અલ્તાફ તથા તેના ચાર મિત્રો એમ કુલ 6 જણા એક કાર લઈને ત્યાં આવ્યા હતા. ફઝલ અહેમદે ફરિયાદી પાસે જઈને ઈકબાલ બાટલી ક્યાં છે તેવું કહેતા ફરિયાદીએ પોતાને ખબર ન હોવાનું જણાવતા ફઝલ અહેમદે તેની પર ઉશ્કેરાઈને તેને માર માર્યો હતો અને તમામ આરોપીઓએ ભેગા મળીને ફરિયાદીને ગડદા પાટુનો માર મારવાનો શરૂ કર્યો હતો.
આ પણ વાંચો Ahmedabad Crime : જમાલપુરમાં ધોળે દિવસે આંગડિયા કર્મી પાસેથી લૂંટાયા 26 લાખ, આરોપી ફાયરિંગ કરી ફરાર
બે રાઉન્ડ હવામાં ફાયરિંગ : નાસીર હુસેને બુમાબુમ કરતા ફઝલે ફોરવ્હીલ ગાડીમાંથી એક પિસ્ટલ લઈને બે રાઉન્ડ હવામાં ફાયરિંગ કર્યું હતું, જેથી ફરિયાદી અને તેના મિત્રો ડરીને દોડીને ચાલીની અંદર ભાગી રહ્યા હતા તે સમયે ફઝલે એક રાઉન્ડ ફાયરિંગ ફરિયાદીની પાછળ કર્યું હતું. જોકે ફરિયાદી અંદર ફરાર થઈ ગયા હતા.
હોમગાર્ડ જવાનોને મળ્યાં ફરિયાદી : જે બાદ થોડા સમય બાદ ફરિયાદી ચાલીના ગેટ પાસે આવ્યા હતા અને જોતા તમામ આરોપીઓ ત્યાંથી ભાગી ગયા હતા. તે વખતે હોમગાર્ડના બે જવાનો ત્યાં આવ્યા હતા અને તેઓને પૂછપરછ કરતા તેઓએ આ હકીકતની જાણકારી હતી. જોકે તેઓને મિત્રની દીકરીનો પ્રસંગ હોય તેઓ રાત્રે ફરિયાદ કરવા માટે ગયા ન હતા અને પ્રસંગ પૂરો કરીને અંતે રખિયાલ પોલીસ મથકે ફરિયાદ નોંધાવી હતી.
આ પણ વાંચો માણાવાવમાં જમીન પડાવી લેવાની ફરિયાદ, તોડફોડ અને ફાયરિંગની ઘટના
એસઓજી ક્રાઇમે બેને પકડ્યાં : આ ઘટનાના પગલે રખિયાલ પોલીસે 6 શખ્સો સામે મારામારી હત્યાનો પ્રયાસ અને આર્મ્સ એક્ટ હેઠળ ગુનો દાખલ કરીને અલગ અલગ ટીમો કામે લગાડી હતી અને ઘટના સ્થળ ઉપરથી એક ફૂટેલા કારતુસને પણ કબ્જે કર્યો હતો. આ મામલે ક્રાઈમ બ્રાન્ચ અને અલગ અલગ એજન્સીની ટીમ આરોપીઓને પકડવાના કામે લાગી હતી, ત્યારે અમદાવાદ શહેર એસઓજી ક્રાઈમએ ગુનામાં સામેલ બે આરોપીઓની અટકાયત કરીને તપાસ અને પૂછપરછ હાથ ધરી છે, ત્યારે આરોપીઓની પૂછપરછ બાદ જ સમગ્ર ગુના પાછળનું કારણ સામે આવશે.
ઘટના સંદર્ભે ગુનો દાખલ : આ અંગે રખિયાલ પોલીસ સ્ટેશનના પીઆઈ એ.પી સોલંકી ETV ભારત સાથે ટેલિફોનિક વાતચીતમાં જણાવ્યું હતું કે આ ઘટના સંદર્ભે ગુનો દાખલ કરીને ઘટના સ્થળ પરથી એક ફૂટેલું કારતુસ કબજે કરવામાં આવ્યું છે અને અલગ અલગ ટીમો આરોપીઓને પકડવાના કામે લાગે છે.
