અમદાવાદઃ અમદાવાદ પોલીસને એક સંસ્થા દ્વારા સલામત સવારી પહેલના સંદર્ભમાં પોલીસના યોગદાન અને રસ્તાઓ પર સલામત પદ્ધતિઓને પ્રોત્સાહન મળે તે માટે 5 બાઈક આપવામાં આવી છે. આ બાઈકમાં પોલીસની ગાડીની જેવી જ સુવિધાઓ પણ રાખવામાં આવી છે.
અમદાવાદ શહેર પોલીસ કમિશનર કચેરી ખાતે અમદાવાદના સેકટર-2 હસ્તકના 4 પોલીસ સ્ટેશનોને 5 અદ્યતન ટેક્નોલજીવાળી બાઈક ભેટ કરવામાં આવી છે. આ બાઈક અમદાવાદ શહેર પોલીસ કમિશનર આશિષ ભાટિયા અને સેકટર-1 જેસીપી નિપુણ તોરવણેની હાજરીમાં આપવામાં આવ્યાં હતાં. બાપુનગર, કૃષ્ણનગર, મેઘાણીનગર અને વટવા પોલીસ સ્ટેશનને બાઈક આપવામાં આવી છે.
250સીસીની સુઝુકી કંપનીની 5 બાઈક પોલીસને આપવામાં આવી છે. જેની કિંમત અંદાજે 2 લાખ રૂપિયા છે. આ બાઈક પોલીસની કામગીરીમાં મહત્વની ભૂમિકા ભજવશે. ચેન સ્નેચર અને લૂંટ કરતી ટોળકી કે લોકોને પકડવા પોલીસને આ બાઈક સહાયરૂપ થશે. સામાન્ય બાઈક કરતા આ બાઈકમાં અલગ સુવિધા આપવામાં આવી છે.
આ બાઈકમાં પોલીસની જીપની જેવી જ વ્યવસ્થા રાખવામાં આવી છે. જેમાં આગળ સાઈડ લાઈટની બાજુમાં લાલ અને વાદળી કલરની બે લાઈટ રાખવામાં આવી છે, પોલીસનું સાયરન પણ રાખવામાં આવ્યું છે. સ્પીકર અને એનાઉસમેન્ટની પણ સગવડ રાખવામાં આવી છે. કંટ્રોલ રૂમમાં મેસેજ આપવાની પણ વ્યવસ્થા કરવામાં આવી છે. આમ આ બાઈકમાં સુસજ્જ ફીચર્સ છે, જે પોલીસની કામગીરી અસરકારક બનાવવામાં ખૂબ જ મદદરૂપ થશે.
