સુરત શહેર પોલીસ આરોપીઓ કે નિર્દોષ કોઈને પણ એક વખત તેમની ઝપટમાં આવે એટલે કઇ પણ વિચાર કર્યા વિના અમાનુષી અત્યાચાર ગુજારવામાં પાછું ફરીને જોતી નથી. આવી જ કઈક ઘટના ડીંડોલી પોલીસ સ્ટેશનમાં બની છે. પીડિત યુવાનને સારવાર માટે કોર્ટે નવી સિવિલ હોસ્પિટલમાં મોકલતા ડીંડોલી પોલીસની નિર્દય હરકતો બહાર આવી છે. હવે પોલીસ પણ કોર્ટ કાર્યવાહીની ભીંસમાં આવે તેવી સંભાવના છે.
ડીંડોલી પોલીસ સ્ટેશનમાં નોંધાયેલા ચોરીના એક ગુનામાં શકમંદ તરીકે ઝડપાયેલી યુવતીએ તેની બહેનપણીના ઘરમાં અંદાજે દોઢ લાખ રૂપિયાની ચોરી કરીને આ રૂપિયા ડીંડોલી ગોડાદરા ખાતે આવેલી વરદાન રેસીડન્સીમાં રહેતા બોબી ક્રિષ્ના યાદવને આપ્યા હોવાનું જણાવ્યું હતું. જેથી પોલીસ વરદાન રેસીડન્સી ખાતે તપાસ અર્થે ગઇ હતી. પરંતુ 21 વર્ષીય યુવાન બોબી નોકરી પર ગયેલો હોવાથી તેની માતાએ બોબીને ફોન કરીને સમગ્ર વાત કરી હતી. જેથી બોબી આ કેસમાં કંઈ ન જાણતો હોવાનું કહેવા માટે 27મી તારીખના રોજ ડીંડોલી પોલીસ સ્ટેશન પહોંચ્યો હતો. જ્યાં પોલીસ સ્ટાફ દ્વારા બોબીને ઢોર માર મારીને અર્ધ બેભાન બનાવી દેવાયો હતો. ત્યાર બાદ તેના ગુપ્તાંગમાં પેટ્રોલ નાંખવા સાથે મરચાની ભૂકી પણ નાખી હતી. માનવતા નેવે મુકીને ડીંડોલી પોલીસ દ્વારા બોબી નામના યુવાન પર અમાનવીય અત્યાચાર ગુજારવામાં આવતા આખરે બોબીના પિતાએ પોલીસનો સંપર્ક કરવા પ્રયાસ કર્યો હતો. જો કે, તેમને બોબીને મળવા દેવાયા ન હતા. એટલું જ નહીં પિતાને પણ અંદર કરી દેવાની ધમકી આપી હતી.
આખરે કોર્ટમાં પોતાના પુત્રને છેલ્લા ત્રીસ કલાકથી ડીંડોલી પોલીસે ગોંધી રાખ્યો હોવાની ફરિયાદ લઇ કોર્ટ પહોંચ્યા હતા. કોર્ટે ડીંડોલી પોલીસને બોબીને કોર્ટમાં રજૂ કરવા હુકમ કર્યો હતો. જો કે, પોલીસે બોબીને ધમકી આપીને તેને માર મારવામાં આવ્યો નથી એવુ નિવેદન આપવા દબાણ કર્યું હતું. તેમજ જો કોઇ નિવેદન આપશે તો તારા આખા ઘરને જીવવાનું મુશ્કેલ કરી દેશે, એવી ધમકી પણ આપી હતી. પરંતુ બોબીએ કોર્ટમાં પોતાના પર પોલીસે આચરેલી અત્યાચારની તમામ વિગતો કહી હતી. તેમજ ગુપ્તાંગમાં પેટ્રોલ રેડવા સાથે લાલ મરચાની ભુકી નાંખવામાં આવી હોવાનું પણ જણાવ્યું હતું. જેથી કોર્ટે બોબીને મેડીકલ ચેકઅપ અને સારવાર માટે નવી સિવિલ હોસ્પિટલ ખસેડવાનો આદેશ આપ્યો હતો. જ્યાં સુરત નવી સિવિલ હોસ્પિટલ ખાતે પીડિત યુવાને સારવાર લેવાની ફરજ પડી હતી. તબીબી તપાસમાં યુવાનના શરીર પરથી ઇજા તેમજ માર માર્યાના નિશાન મળી આવ્યા હતા.
કોર્ટ દ્વારા આ મામલે ડીંડોલી પોલીસ સામે કડક કાર્યવાહી કરવામાં આવે તેવી સંભાવના વ્યક્ત કરવામાં આવી રહી છે. જો કે પીડિત યુવાનના પિતાએ પણ જવાબદાર પોલીસ કર્મચારીઓ સામે કાર્યવાહીની માગ કરી છે.
