મોસ્કોઃ રશિયા કોરોનાની રસી શોધવામાં સફળ થયું હોવાના દાવાઓ થઈ રહ્યાં છે. રશિયાની સેચિનોવ યુનિવર્સિટીએ દાવો કર્યો છે કે, અમે કોરોના વાઇરસ માટેની રસી તૈયાર કરી છે. યુનિવર્સિટીનું કહેવું છે કે, તમામ રસી પરીક્ષણો સફળતાપૂર્વક પૂર્ણ કરવામાં આવ્યાં છે. જો આ દાવો સાચો હશે, તો કોરોના વાઇરસની દુનિયાની આ પ્રથમ રસી હશે.
જો કે, યુનાઇટેડ સ્ટેટ્સ સહિત વિશ્વના ઘણા વિકસિત દેશો કોરોના પર રસી તૈયાર કરવામાં વ્યસ્ત છે, જેમાં ભારતમાં પણ બે સંસ્થાઓ દ્વારા ક્લિનિકલ ટ્રાયલ શરૂ છે. ઘણા અજમાયશ તબક્કે નિષ્ફળ પણ ગયા છે, પરંતુ રશિયાએ પરીક્ષણ કરી સફળ ગણાવીને પ્રથમ રસી શોધવાનો દાવો કર્યો છે. ભારતમાં રશિયન દૂતાવાસે રસીના મામલે ટ્વીટ કરી કહ્યું કે, કોરોના સંક્રમણ સામે વિકસિત કરાયેલી આ પ્રથમ રસી છે.
18 જૂનથી રસીનું પરીક્ષણ શરૂ થયું છે.
ઇન્સ્ટિટ્યૂટ ફોર ટ્રાન્સલેશન મેડિસિન એન્ડ બાયોટેકનોલોજીના ડિરેક્ટર વાદિમ તારાસોવએ કહ્યું કે, યુનિવર્સિટીએ રશિયાની ગેમલી ઇન્સ્ટિટ્યૂટ એપીડેમિઓલોજી અને માઇક્રોબાયોલોજી દ્વારા 18 જૂનથી ઉત્પાદિત રસીનું પરીક્ષણ શરૂ કર્યું હતું. તારાસોવે કહ્યું કે, સેચિનોવ યુનિવર્સિટીએ વિશ્વની પ્રથમ રસીનું માનવીઓ પર સફળતાપૂર્વક પરીક્ષણો પૂર્ણ કરાયા છે.
ટૂંક સમયમાં બજારમાં મુકાશે આ વેક્સીન
આ સમગ્ર અભ્યાસનો હેતુ માનવ સ્વાસ્થ્યના રક્ષણ માટે કોવિડ-19ની રસી સફળતાપૂર્વક તૈયાર કરવાનો હતો. લુકાશેવે સ્પુટનિકને કહ્યું કે, રસીના તમામ પાસાઓની સલામતી માટે તપાસ કરવામાં આવી છે. લોકોની સલામતી માટે ટૂંક સમયમાં બજારમાં આ વેક્સીન ઉપસ્થિત થઈ જશે.
