જામનગર: ઉદાસીન આશ્રમના મહંત હરિદાસબાપુએ મહિલા સાથે આચર્યું દુષ્કર્મ

હાલમાં તો સંતો-મહંતો પર દુષ્કર્મના આરોપો લાગવા સામાન્ય બની ગયા હોય તેવું લાગી રહ્યું છે. ફરી એકવાર એક મહંતે મહિલા સાથે દુષ્કર્મ કર્યું. આ વખતે ઘટના બની છે જામનગરમાં. જામનગરમાં આવેલા ઉદાસીન આશ્રમના મહંત હરિદાસબાપુએ આશ્રમમાં સેવા આપતી મહિલાને 'હું બીમાર છું' કહીને આશ્રમે બોલાવી હતી. મહિલા જ્યારે મહંતના પગ દબાવી રહી હતી ત્યારે મહંતે મહિલા સાથે અડપલાં કર્યા હતા અને ત્યારબાદ મહિલા સાથે દુષ્કર્મ કર્યું હતું. આ બાબતે મહિલાએ પોલીસ ફરિયાદ નોંધાવી છે.

• જામનગરમાં ઉદાસીન આશ્રમમાં લંપટ મહંતે મહિલા સાથે દુષ્કર્મ આચર્યું
• સેવા કરાવવાના બહાને મહિલાને બોલાવી મહિલા સાથે દુષ્કર્મ કર્યું હતું
• પરિણીત મહિલાએ જોડિયા પોલીસમાં લંપટ મહંત સામે નોંધાવી ફરિયાદ
  
  

જામનગરઃ જોડિયા તાલુકાના બાલભા ગામમાં એક ચકચાર મચાવનાર ઘટના બની છે, જેની જોડિયા પોલીસ સ્ટેશનમાં પહોંચી છે અને જોડિયા પોલીસ પાસેથી મળી રહેલા વિગતો પ્રમાણે જોડિયા નજીક બાલભા ગામે ઉદાસીન આશ્રમ આવ્યો છે. અને આ આશ્રમના મહંત તરીકે 56 વર્ષના હરિદાસબાપુ કાર્યભાર ભાળે છે. થોડા સમય પૂર્વે આશ્રમના અનુયાયી એક મહિલાને મહંતે ફોન પર કહ્યું કે, હું બીમાર છું. તમે મારી સેવા કરવા આવો. નજીકના ગ્રામીણ વિસ્તારમાં રહેતી 40 વર્ષની પરિણીતાને પોતાના આશ્રમે બોલાવી હતી. પરિણીતા જ્યારે મહંતના પગ દબાવી રહી હતી ત્યારે હરિદાસબાપુની નિયત બગડતા મહિલા સાથે શારીરિક અડપલાં કર્યા હતા અને ત્યારબાદ મહિલા સાથે દુષ્કર્મ કર્યું હતું.

મહંત વારંવાર ધમકી આપતો હોવાથી મહિલાએ મોડી ફરિયાદ નોંધાવી

આ બાદ ફરિયાદીએ મોડી પોલીસ ફરિયાદ દાખલ કરી હતી. આ પાછળનું કારણ એવું જણાવ્યું કે, મહંત અવારનવાર મહિલાને ધમકી આપતો હતો. મહંત કહેતો હતો કે, તું કોઈને આ વિશે જાણ કરીશ તો હું તાંત્રિક વિધિ કરીશ અને મારા અનુયાયીઓને કહીશ કે તને અને તારા પરિવારને નુકસાન પહોંચાડે. આ સમગ્ર બાબતની ફરિયાદ જોડિયા પોલીસ સ્ટેશનમાં નોંધાતા પીએસઆઈ એમ. આર. વાળા. સહિતના સ્ટાફે આગળની તપાસ શરૂ કરી છે.