જામનગર SOGએ જામજોધપુરમાંથી ગાંજાના જથ્થા સાથે એક ઈસમને ઝડપી પાડ્યો

રાજ્યમાં નશાના વેપાર પર અંકુશ લગાવવા અને નશાખોરીના દૂષણને ડામવાની દિશામાં ગુજરાત પોલીસ કામગીરી કરી રહી છે. આ કામગીરીના ભાગરૂપે જામનગર મહિલા પોલીસ અધિક્ષક શ્વેતા શ્રીમાળીના માર્ગદર્શન હેઠળ જામનગરમાં નશાનો વેપાર કરતા ઈસમોને ઝડપી પાડવા ખાસ ડ્રાઈવ કરવામાં આવી હતી. જ્યારે જામનગર એસઓજીએ જામજોધપુરમાંથી ગાંજાના જથ્થા સાથે એક ઈસમને ઝડપી પાડ્યો હતો.

જામનગર: નશાખોરીના દૂષણને ડામવા તેમજ નશાનો વેપાર કરનારા શખ્સોને પકડવામાં જામનગર એસઓજી પોલીસને સફળતા મળી છે. એસઓજીને મળેલી બાતમીના આધારે પાટણ રોડ પર આવેલા પૂલીયા પાસેના જાહેર રોડ પરથી પસાર થતા રમેશ મગનભાઈ ઝિંઝુવાડિયાને પકડી પૂછપરછ કરતા તેની પાસેથી ગેરકાયદે કેફી પદાર્થ ગાંજો મળ્યો હતો. પોલીસે 1 કીલો 100 ગ્રામ ગાંજો, એક મોબાઈલ મળી કુલ રૂ. 12 હજારનો મુદ્દામાલ કબ્જે કર્યો હતો. આ ગાંજો મુળ જામજોધપુર અને હાલ સુરત રહેતા જયદીપ મુકેશભાઈ કુંભારે આપ્યો હોવાનું જાણવા મળ્યું હતું. આથી બંને વિરુદ્ધ જામજોધપુર પોલીસ સ્ટેશનમાં એનડીપીએસ એકટ મુજબ ગુનો દાખલ કરવામાં આવ્યો છે. જ્યારે આગળની તપાસ જામજોધપુર પોલીસ સ્ટેશનના પીઆઈ ચલાવી રહ્યા છે.

જામનગર એસઓજીએ જામજોધપુરમાંથી ગાંજાના જથ્થા સાથે એક ઈસમને ઝડપી પાડ્યો

આ કાર્યવાહી જામનગર મહિલા પોલીસ અધિક્ષક શ્વેતા શ્રીમાળીના માર્ગદર્શન હેઠળ કરવામાં આવી હતી, જેમાં એસઓજી પોલીસ ઈન્સપેકટર સહિત અન્ય કર્મચારીઓએ પણ ભાગ લીધો હતો.