ગાંધીનગરઃ ગાંધીનગર કલેકટર દ્વારા ગઈકાલે એટલે કે ગુરુવારે જ જાહેરનામું બહાર પાડવામાં આવ્યું છે. જેમાં સ્પષ્ટ ઉલ્લેખ કરાયો છે કે, જે લોકો માસ્ક વિના ફરશે તેમની પાસેથી દંડ વસૂલ કરવામાં આવશે. અત્યાર સુધી સમગ્ર જિલ્લામાંથી અઢી લાખ રૂપિયા જેટલો દંડ વસૂલ કરવામાં આવ્યો છે. ત્યારે કોરોના વાઈરસ ગાંધીનગર શહેર અને જિલ્લામાં માજા મૂકી રહ્યો છે. તંત્ર અટકાવવા માટેના પ્રયાસો કરે છે પરંતુ વામણું પુરવાર થઇ રહ્યું છે.
પાટનગરમાં દંડ આપતા કોર્પોરેશનના દીવા તળે અંધારું, માસ્ક વગર કામ કરતાં મજૂરો શહેરની મધ્યમાં સેક્ટર 17 માં મહાનગરપાલિકાનું નવું બિલ્ડિંગ બની રહ્યુ છે, ત્યાં મોટા પ્રમાણમાં મજૂરો કામ કરી રહ્યાં છે પરંતુ આ તમામ મજૂરો માસ્ક વિના જ કામગીરી કરી રહ્યાં છે. ત્યારે જો આમાંથી એક પણ વ્યક્તિને કોરોના પોઝિટિવ સંક્રમણ થયું તો આખી સાઈટ સીલ કરવાનો સમય આવશે. પરિણામે બિલ્ડીંગની કામગીરી અટકી જશે અને યોગ્ય મુદતમાં પૂરું થઈ શકશે નહીં. ત્યારે બજારમાં માસ્ક વિના ફરતા સામાન્ય નાગરિકોને તો 200 રૂપિયાની પાવતી આપવામાં આવી રહી છે, તંત્ર આ તરફ પોતાનો રાઉન્ડ ગોઠવે તેવું ત્યાંથી અવરજવર કરતા લોકો ઈચ્છી રહ્યાં છે.બિલ્ડિંગ કોન્ટ્રાક્ટર દિનેશભાઇએ કહ્યું કે, તમામ મજૂરને માસ્ક આપવામાં આવ્યાં છે. તે ઉપરાંત સેનેટાઈઝર દ્વારા હાથ પણ સાફ કરાવવામાં આવી રહ્યાં છે, પરંતુ ગરમીના કારણે મજૂરો માસ્ક ઉતારી નાખે છે. વારંવાર કહેવાં છતાં મજૂરો માસ્ક પહેરતાં નથી. ઉલ્લેખનીય છે કે મહાપાલિકાનું તંત્ર આ તરફ પોતાની નજર નાખે તો અનેક લોકો સંક્રમણમા આવતાં બચી શકે છે. અન્યથા ગાંધીનગરમાં કેસ વધી રહ્યાં છે તેમાં હજુ વધારો થશે.
