ગાંધીનગરઃ દિવાળી અને ગુજરાત વિધાનસભાની ચૂંટણી પહેલા ગુજરાત રાજ્ય (Gujarat Government) સરકારે શિક્ષકો માટે મોટો નિર્ણય લીધો છે. જેમાં પ્રાથમિક શાળા વિભાગના શિક્ષકો પરસ્પર બદલી કરી શકશે. આ માટે એક ખાસ કેમ્પનું પણ આયોજન કરવામાં આવ્યું છે. આ કેમ્પની તારીખ પણ જાહેર કરી દેવામાં આવી છે. આગામી તારીખ 20 ઑક્ટોબરથી 29 ઑક્ટોબર સુધી આ બદલી કેમ્પ યોજાશે. જ્યારે ઓનલાઈન બદલી માટેની પણ સુવિધા આપવામાં આવી છે.
ઓનલાઈન બદલીઃ બદલી કેમ્પની સાથે ઓનલાઈન બદલી (Gujarat Primary Teacher Camp) માટેનો પ્રથમ તબક્કો તારીખ 20 ઑક્ટોબરના રોજ યોજાશે. જ્યારે ઓનલાઈન બદલી માટેનો બીજો તબક્કો તારીખ 23 ઑક્ટોબરના રોજ યોજાશે. જ્યારે શિક્ષકો માટે જિલ્લા ફેરબદલી માટેનો કેમ્પ 6 ડીસેમ્બરના રોજ યોજાશે. રાજ્ય સરકાર તરફથી મુખ્ય શિક્ષકોની આસપાસના જિલ્લાઓમાં બદલી થઈ શકશે. આ માટે ચોક્કસ પરિપત્ર બહાર પાડવામાં આવ્યા છે. 31 માર્ચ 2022 થી પાંચ વર્ષ પૂરા કરેલા શિક્ષકોની અરજીને ધ્યાને લેવા પણ ખાસ આદેશ આપવામાં આવ્યા છે.
સરકારનો કાર્યક્રમઃ કેમ્પની વિગત અનુસાર તારીખ 20 ઑક્ટોબરથી 29 ઑક્ટોબર સુધી વઘ-ઘટ કેમ્પ યોજાશે. એ પછી જિલ્લામાં આંતરિક બદલી કેમ્પ યોજાશે. જેનો પ્રથમ તબક્કો 2 નવેમ્બરના રોજ શરૂ થશે જ્યારે તારીખ 20 નવેમ્બરના રોજ પૂર્ણ થઈ જશે. બીજો તબક્કો 23 નવેમ્બરના રોજ શરૂ થશે જ્યારે એ તબક્કો 2 ડીસેમ્બરના રોજ પૂર્ણ થશે. જિલ્લા ફેરબદલી કેમ્પ માટે 6 ડીસેમ્બરના રોજ કેમ્પ યોજાશે. જે તબક્કો 8 ડીસેમ્બરના રોજ પૂર્ણ થઈ જશે.
શિક્ષણ વિભાગના 14-10ના ઠરાવ અનુસાર સુધારા બદલીના નિયમો જાહેર કરી દેવાયા છે. શિક્ષણ વિભાગના તારીખ 1 એપ્રિલના તથા 14-10ના બદલી ઠરાવની જોગવાઈઓને આધીન પ્રાથમિક શિક્ષક, વિદ્યા સહાયકના વધ ઘટ તથા જિલ્લા આંતરિક બદલીના કેમ્પ યોજાશે. આ અંગેની તારીખ જાહેર કરી દેવાઈ છે. ---જીતુ વાઘાણી (શિક્ષણ પ્રધાન, ગુજરાત)
