રાજકોટ: રાજકોટમાં રહેતી સગીરાની છેડતી મામલો કોર્ટે આરોપીને દોષી ગણાવતા 5 વર્ષની સખત કેદની સજા ફટકારી છે. સગીરાની માતાએ ફરીયાદમાં જણાવ્યું હતું કે, તે દિવસે તેમની પાલતુ બિલાડી અગાશી ઉપર જતી રહી હતી,જેથી તેમની સગીર દિકરી અગાશી ઉપર બિલાડીને લેવા જતા, આરોપીએ તેની પર જાતીય હુમલો કર્યો હતો અને જાતીય સતામણી કરેલી. આ બાબતે ગુનો નોંધાતા આરોપીની ધરપકડ કરવામાં આવી હતી અને આરોપીને 5 વર્ષની સખત કેદની સજા ફટકારવામાં આવી હતી.
શું હતો સમગ્ર મામલો ?
વર્ષ 2023માં રાજકોટમાં રહેતી 12 વર્ષીય સગીરા અગાશી પર હતી, ત્યારે તેની સાથે છેડતીનો બનાવ બન્યો હતો. આ કેસમાં સગીરાની માતાએ ફરીયાદ નોંધાવી હતી. આ બાબતે ગુનો નોંધાતા આરોપીની ધરપકડ કરવામાં આવેલી અને પોકસો કોર્ટમાં કેસ ચાલતા ભોગ બનનાર તેની માતા પોલીસ વિટનેસ, જન્મ તારીખ અંગેના સાક્ષી વગેરેને તપાસવામાં આવ્યા.
કોર્ટમાં ધારદાર દલીલો
બંને પક્ષે દલીલો બાદ પોકસો કોર્ટના જજ વી.એ.રાણાએ આરોપીને તકસીરવાન ઠેરવીને આઈ.પી.સી. કલમ-354 તથા પોકસો એકટની કલમ-8 હેઠળ 5 વર્ષની સખત કેદની તેમજ રૂ.15,000નો દંડ ફટકારતો હુકમ કર્યો છે.
ભોગ બનનારની ઉંમરને તથા તેના બાળ માનસ ઉપર થયેલી અસરને કારણે સરકારી સ્કીમ મુજબ રૂ.50,000નું વળતર ચુકવવાનો પણ હુકમ કર્યો છે. આ કેસમાં સરકાર પક્ષે સરકારી વકીલ મહેશકુમાર જોષી અને આસીસ્ટન્ટ એડવોકેટ ઋષિરાજસિંહ ચાવડા રોકાયેલ હતા, તેવું ભક્તિનગર પી.આઈ.એમ.એમ.સરવૈયા જણાવ્યુ હતું.
