ગાંધીનગરઃ ગાંધીનગર મહાનગરપાલિકા વિસ્તારમાં કોરોના વાઇરસના કેસ સદી વટાવી ચૂક્યાં છે. પાટનગરમાં પ્રથમ કેસ ગત 18 માર્ચના રોજ સેક્ટર 29માં આવ્યો હતો. ત્યારબાદ હાલમાં માત્ર બે જ સેક્ટર એવા છે, જ્યાં કોરોના વાઇરસ પ્રવેશી શક્યો નથી. કેસ સામે આવતાંની સાથે જ પાલિકાના તંત્ર દ્વારા તે વિસ્તારને ક્વોરન્ટીન જાહેર કરી દેવામાં આવતો હતો. ત્યાર બાદ દર્દી ઘરે આવે તેના 28 દિવસ બાદ તે વિસ્તાર ફ્રી જાહેર થતો હતો. પરંતુ પાલિકાના સત્તાધીશો દ્વારા હવે આ બાબતે વ્હાલાંદવલાંની નીતિ અપનાવવામાં આવી રહી છે, તેને લઈને નાગરિકોમાં મોટા પ્રમાણમાં રોષ જોવા મળી રહ્યો છે.
ક્વોરન્ટીન વિસ્તાર બનાવવામાં મહાપાલિકાની વ્હાલાંદવલાંની નીતિ? ગાંધીનગર શહેર વિસ્તારમાં હાલમાં મોટાભાગના સેક્ટરમાં એક્ટિવ કેસ જોવા મળી રહ્યાં છે. નગરજનોની સુરક્ષાને લઈને જ્યાં કોરોનાનો કેસ સામે આવે તે વિસ્તારને કોર્ડન કરવામાં આવે છે. તે વિસ્તારમાં અવરજવર કરતાં લોકોનું રજીસ્ટર નિભાવવામાં આવે છે. પરંતુ છેલ્લાં કેટલાક દિવસોથી વિસ્તારમાં અંગત રસ લઈને કેટલાક લોકો દ્વારા કોવિડ 19 ગાઇડલાઇનના લીરેલીરા ઉડાવી દેવામાં આવતા હોય તેવું સામે આવી રહ્યું છે. ગાંધીનગર શહેરના સેક્ટર-17માં ફાયર વિભાગનો એક કર્મચારી પોઝિટિવ આવ્યાં બાદ તેને બે દિવસ પહેલાં એટલે કે 31 મીએ રાત્રે 9 વાગ્યાના અરસામાં ડિસ્ચાર્જ કરવામાં આવ્યો હતો. પરંતુ આ વિસ્તારને બે દિવસમાં જ ક્વોરન્ટીન મુક્ત કરી દેવામાં આવ્યો છે.કોવિડ-19ની ગાઈડ લાઈન પ્રમાણે દર્દી ડિસ્ચાર્જ થાય તેના 28 દિવસ બાદ તે વિસ્તારને ક્વોરન્ટીનમુક્ત જાહેર કરવામાં આવવો જોઇએ. પરંતુ આ વિસ્તારને બે જ દિવસમાં ફ્રી જાહેર કરી દીધો છે. જ્યારે સેક્ટર-21માં પણ આ જ પ્રકારે નીતિ અપનાવવામાં આવી છે. આ બાબતે ગાંધીનગર મહાનગરપાલિકાના ડેપ્યુટી કમિશનર પી.સી. દવે સાથે વાત કરતા તેમણે જણાવ્યું હતું કે, દર્દી ડિસ્ચાર્જ થાય તેના 28 દિવસ બાદ તે વિસ્તારને જો કોઇ કેસ નવો ન આવે તો ફ્રી જાહેર કરવામાં આવતો હોય છે. સેક્ટર 17 અને 21 બાબત મારા જાણમાં નથી, પરંતુ હું જોવડાવી લઈશ. 3
સૂત્રોએ જણાવ્યું હતું કે, મહાપાલિકાનું બિલ્ડિંગ ફાયર સ્ટેશનની અંદર બની રહ્યું છે. ત્યારે તેની કામગીરી ઝડપથી પૂર્ણ થાય તે માટે તે વિસ્તારને મુક્ત કરી દેવામાં આવ્યો છે. જ્યારે સેક્ટર-21માં પણ ફૂટપાથ સહિતની કામગીરી શરૂ કરવામાં અડચણ ઉભી ન થાય તે માટે તે વિસ્તારમાં પણ આ જ રીતની નીતિ અપનાવાઈ છે. મહત્વની બાબત એ છે કે, ગાંધીનગર શહેરમાં હાલમાં પણ અનેક સેક્ટરને કોરેન્ટાઇન જાહેર કરાયાં છે. જ્યાં રહેતા નગરજનો પોતાના મકાનમાં કેદ વસવાટ કરી રહ્યાં છૅ. ત્યારે આ બાબતે આગામી સમયમાં રોષ ફાટી નીકળે તેવી દહેશત જોવા મળી રહી છે.
