કોરોના વાયરસનો વર્તાતા કહેર વચ્ચે રાજ્યમાં 3 મોત, 43 પોઝિટિવ, પાટનગરમાં ફુવાના મમ્મી પણ ઝપેટમાં

રાજ્યમાં કોરોના વાઇરસના અત્યાર સુધી માત્ર પોઝિટિવ રિપોર્ટની સંખ્યા વધી રહી હતી, પરંતુ હવે મોતનો આંકડો પણ વધી રહ્યો છે. માત્ર 2 દિવસના સમયમાં મોતનો આંકડો 3 સુધી પહોંચી ગયો છે. જેમાં પહેલું મોત સુરતમાં થયું હતું. ત્યારબાદ અમદાવાદ અને ભાવનગરમાં થઇને 2 મોત થયાં છે. જ્યારે કોરોના વાઇરસ પોઝિટિવ દર્દીઓની સંખ્યા 43 ઉપર પહોંચી છે. ગાંધીનગર શહેરમાં કોરોના ફેલાવનારા એક જ પરિવારનો આ સાતમો સભ્ય ચેપગ્રસ્ત થયો છે. બીજી તરફ ગાંધીનગરમાં જ સારવાર કરતા આરોગ્ય વિભાગના 2 કર્મચારીના સેમ્પલ પણ લેવામાં આવ્યા છે.

ગાંધીનગરઃ આરોગ્ય વિભાગના અગ્ર સચિવ જયંતિ રવિએ ગુરુવારે પ્રેસ કોન્ફરેન્સ યોજી હતી. જેમાં તેમણે કોરોના અંગેની માહિતી આપતા જણાવ્યું હતું કે, રાજ્યમાં અમદાવાદ 15, સુરત 7, રાજકોટ 4, વડોદરા 8, ગાંધીનગર 7, ભાવનગર અને કચ્છ 1 પોઝિટિવ દર્દીઓ સામે આવ્યા છે. જ્યારે ભાવનગરના 70 વર્ષીય પુરૂષનું કોરોનાને કારણે મોત થયું છે. તેની સાથે અમદાવાદમાં પણ સાઉદી અરેબિયાથી આવેલી એક 85 વર્ષીય મહિલાનું મોત થયું છે, ત્યારે માત્ર 12 કલાકમાં 5 નવા કેસનો ઉમેરો થયો છે અને 2 લોકોના મોત થયા છે. કોરોના વાઇરસ ધીરે-ધીરે હવે કહેર વર્તાવી રહ્યો છે, ત્યારે આ બાબતે નાગરિકો સાવચેતી રાખવી તે જ એક ઉપાય રહેશે.

ગાંધીનગરમાં કોરોના વાઇરસના પોઝિટિવ કેસમાં ત્રીજા નંબરે જોવા મળી રહ્યું છે, ત્યારે ગુરુવારે સાતમો કેસ સામે આવ્યો છે. હવે ફુવાના મમ્મીનો પણ સમાવેશ થયો છે. બીજી તરફ ફાર્માસિસ્ટ પાસે ફરજ બજાવનારી એક મહિલા કર્મચારીનું પણ સેમ્પલ લેવામાં આવ્યું છે. આ ઉપરાંત ગાંધીનગર સિવિલમાં ફરજ બજાવનારા એક કર્મચારીને પણ શંકાસ્પદ લક્ષણો જોવા મળતાં તેના સેમ્પલ પણ લેવામાં આવ્યા છે. ગાંધીનગરની વસ્તી પ્રમાણે જોવા જઈએ તો કોરોના વાઇરસનો આંકડો ખૂબ જ વધી રહ્યો છે.