ભાવનગરઃ જિલ્લાના શિક્ષણ તંત્ર દ્વારા આગામી દિવસોમાં પૂરક પરીક્ષા લેવાનો નિર્ણય કર્યો છે. ભાવનગરના વહીવટી તંત્ર અને શિક્ષણ તંત્ર આગામી 25 /8 થી પૂરક પરીક્ષાઓ લેવા જઈ રહી છે, જે માટે સંપૂર્ણ આયોજનનો પ્રારંભ કરી દેવામાં આવ્યું છે.
કોરોના મહામારી વચ્ચે શાળાઓ બંધ છે, ત્યારે શિક્ષણ વિભાગે વહીવટી તંત્ર સાથે મળીને પરીક્ષા લેવાનું આયોજન નિશ્ચિત કર્યું છે. આ સાથે બુધવારથી RTE માટેના ફોર્મ ભરવાનો પણ પ્રારંભ કરી દેવામાં આવ્યો છે. ધોરણ 10 અને 12 માં બે વિષયમાં નાપાસ થનારા વિદ્યાર્થીઓ જે જૂન-ઓગસ્ટમાં પરીક્ષા આપવા માંગતા હોય અને પરીક્ષા માટે ફોર્મ ભર્યું હોઈ તેવા વિદ્યાર્થીઓની બાકી રહેલી પરીક્ષા આગામી દિવસોમાં લેવાનું નક્કી કરવામાં આવ્યું છે. આ સાથે શિક્ષણ વિભાગ દ્વારા ગુજકેટની પરીક્ષા માટેનું પણ આયોજન કરવામાં આવ્યું છે.
શહેર અને જિલ્લામાં ધોરણ 10ની પૂરક પરીક્ષામાં 11,921 વિદ્યાર્થીઓ 621 બ્લોકમાં 31 બિલ્ડિંગમાં પરીક્ષા આપશે, જ્યારે ધોરણ 12 વિજ્ઞાન પ્રવાહની 840 વિદ્યાર્થીઓ 37 બ્લોકમાં 04 બિલ્ડિંગમાં પરીક્ષા આપશે. તેમજ ધોરણ 12 વિજ્ઞાન પ્રવાહની ગુજકેટની કોમન એન્ટ્રન્સ પરીક્ષામાં 5209 વિદ્યાર્થી 263 બ્લોકમાં 25 બિલ્ડિંગમાં પરિક્ષા આપશે.
આ પરિક્ષાઓ 25/8 થી 27/8 સુધી ચાલશે, જેમાં ગુજકેટ 24/8ના રોજ લેવામાં આવશે. કોરોના મહામારીમાં 18,030 વિદ્યાર્થીઓ પરિક્ષા આપશે, આ તમામ વિદ્યાર્થીઓને થર્મલ સ્ક્રીનિગ અને માસ્ક સાથે પ્રવેશ આપવામાં આવશે. પરીક્ષા માટે બિલ્ડીંગને સેનીટાઇઝ કરવામાં આવશે, જોકે શિક્ષણ તંત્ર દ્વારા દરરોજ બિલ્ડીંંગને સેનીટાઇઝ કરવાનું પણ વિચારવામાં આવી રહ્યું છે.
