અમદાવાદમાં અઠવાડિયા અગાઉ નવજાત બાળકીને ત્યજી દેનાર આરોપીઓ ઝડપાયા

અમદાવાદના મણિનગર વિસ્તારમાં અઠવાડિયા અગાઉ 12 દિવસની બાળકીને ત્યજી દેવાના કિસ્સામાં પોલીસે એક મહિલા અને રિક્ષાચાલકની ધરપકડ કરી હતી. પોલીસ 200થી વધુ CCTV ફૂટેજ તપાસીને આરોપી સુધી પહોંચી છે, આરોપી તો પકડાયા પરંતુ બાળકી કોની છે તે હજુ સુધી જાણવા મળ્યું નથી. પોલીસે બાળકી અંગે જાણવા આરોપીની પૂછપરછ શરૂ કરી દીધી છે.

• અઠવાડિયા અગાઉ બાળકીને ત્યજી દેવાઈ હતી
• બાળકીને ત્યજી દેનાર 2 આરોપી ઝડપાયા
• 200 CCTV ફૂટેજ તપાસીને પોલીસે આરોપી ઝડપ્યા
  

  બાળકીને ત્યજનાર આરોપી

અમદાવાદ : શહેરના મણિનગર પાસે અઠવાડિયા અગાઉ ત્યજી દીધેલ હાલતમાં બાળકી મળી આવતા પોલીસે તપાસ શરૂ કરી હતી. ત્યારે આ પોલીસ તપાસમાં સી.સી.ટી.વી. ફુટેજમાં એક રિક્ષાની શંકાસ્પદ હિલચાલ જોવા મળી હતી. પોલીસે આ ફુટેજને લઇને જુદા-જુદા વિસ્તારમાંથી 200થી વધુ સી.સી.ટી.વી. ફુટેજ તપાસ્યા હતા અને ફતેવાડીમાં રહેતા રિક્ષાચાલક મુસ્તફા અજમેરી સુધી પહોંચી. રિક્ષા ચાલકની પૂછપરછમાં બાળકને ત્યજી દેવાનો ભેદ ઉકેલાયો. આ બાળકને રાજસ્થાની મહિલા લાવી હોવાનું ખુલતાં પોલીસે બંનેની ધરપકડ કરી પૂછપરછ શરૂ કરી છે.

મહિલા તથા રિક્ષા ચાલકના નિવેદન અલગ-આલગ

પોલીસે બંને આરોપીની ધરપકડ કરીને બાળકી અંગે પૂછપરછ કરતાં બંનેના નિવેદન અલગ-અલગ સામે આવ્યા છે. જેમાં મહિલા આરોપીઓએ જણાવ્યું હતું કે, આ દસ દિવસનું બાળક તેને સી.ટી.એમ. નજીક એક બસ સ્ટેન્ડ પાસેથી મળ્યું હતું. બાળકને ત્યજી દેવાની સલાહ રિક્ષા ચાલક મુસ્તાફે આપી હતી.

માતા-પિતાની હજુ સુધી કોઇ ખબર મળી નથી

પોલીસને આરોપીને પકડવામાં સફળતા તો મળી છે પરંતુ બાળકીના માતા-પિતા સુધી હજુ પોલીસ પહોંચી શકી નથી. જેથી આરોપીની વધુ પૂછપરછ શરૂ કરી છે અને માતા-પિતા સુધી પહોંચવા પ્રયત્ન હાથ ધરવામાં આવ્યો છે.