શાહઆલમ હિંસા કેસમાં કોર્ટે શહેઝાદ ખાન સહિત 12 આરોપીઓના જામીન મંજૂર કર્યા

19મી ડિસેમ્બરના રોજ અમદાવાદના શાહઆલમમાં CAA અને NRC બિલના વિરોધમાં રાખવામાં આવેલા સ્વૈચ્છિક બંધમાં અડધા દિવસની શાંતિ બાદ સાંજે ફાટી નીકળેલા પથ્થરમારાના ભાગરૂપે પોલીસે ધરપકડ કરેલા મુખ્ય આરોપી કાઉન્સિલર શહેઝાદ ખાન સહિત અન્ય 12 આરોપીઓના મંગળવારે અમદાવાદ સેશન્સ કોર્ટે જામીન મંજૂર કર્યા હોવાની વિગતો સામે આવી છે.

અમદાવાદઃ શહેરની સેશન્સ કોર્ટમાં શરતોનું પાલન અને ફરીવાર આ પ્રકારના ગુનામાં સંડોવાશે નહિ તેવી બાંહેધરીના આધારે જામીન મંજૂર કરવામાં આવ્યા હતા. અગાઉ 29ની જાન્યુઆરીના રોજ બોર્ડની બેઠકમાં હાજરી આપવા માટે કોર્ટે શહેઝાદ ખાનના 5 કલાકના જામીન મંજૂર કર્યા હતા.

29મી જાન્યુઆરીના રોજ અમદાવાદ મ્યુનિસિપલ કોર્પોરેશનની બોર્ડની બેઠકમાં ભાગ લેવા દાણીલીમડા વોર્ડના કાઉન્સિલર શહેઝાદ ખાન પઠાણ દ્વારા વચગાળા જામીન મંજૂર કરવામાં આવ્યા હતા. ઉલ્લેખનીય છે કે, 19મી ડિસેમ્બરના રોજ અમદાવાદના શાહઆલમ વિસ્તારમાં હિંસાની જે ઘટના બની હતી, ત્યારબાદ પોલીસે કોર્પોરેટરની ધરપકડ કરી હતી. પોલીસે શાહઆલમ વિસ્તારમાં હિંસાને લીધે 6 દિવસના રિમાન્ડ મંજૂર કર્યા હતા. જ્યારે કોર્પોરેશન પરીસર કચરો ઠાલલવવાના કેસમાં ત્રણ દિવસના રિમાન્ડ મંજૂર કરવામાં આવ્યા હતા.

શાહઆલમ હિંસા કેસમાં પોલીસે હાલ 49 લોકોની અટકાયત કરી છે. હિંસાની નોંધ લેતા સોમવારના રોજ ગૃહ પ્રધાન પ્રદિપસિંહ જાડેજાએ તપાસના આદેશ આપ્યા હતા, જેમાં હિંસા ફેલાવનાર તત્વો સામે કાયદેસરની કાર્યવાહી હાથ ધરવાનો આદેશ આપ્યો હતો. પોલીસ હાલ સીસીટીવીના આધારે આરોપીઓની શોધખોળ કરી રહી છે. ગુરુવારે સાંજે બનેલી સમગ્ર ઘટનામાં 12 જેટલા પોલીસ કર્મચારી અને સામાન્ય લોકોને મળીને કુલ 30 લોકો ઈજાગ્રસ્ત પામ્યા હતા. પોલીસે સ્થિતિ પર કાબુ મેળવવા વિસ્તારમાં પેટ્રોલિંગ અને 10થી વધુ ટિયરગેસના સેલ છોડાયા હતા.