ઑક્ટોબરમાં રાહુલ ગાંધી આવી શકે છે ગુજરાત, યુવા નેતાઓને ગુજરાત કોંગ્રેસની કમાન આપવામાં આવે તેવી અટકળો

તાજેતરમાં જ કૉંગ્રેસે ભાજપના પગલે ચાલતા પંજાબમાં મુખ્યપ્રધાન બદલ્યા છે. કૉંગ્રેસે પણ એ સંકેત આપી દીધા છે કે તે પણ નવા નેતૃત્વ પર દાવ ખેલી શકે છે. ત્યારે ગુજરાત કોંગ્રેસમાં ચાલી રહેલા વિવાદો વચ્ચે આગામી દિવસોમાં રાહુલ ગાંધી ગુજરાત આવશે તેવું કહેવામાં આવી રહ્યું છે. તેઓ આવતા મહિને મળનારી કોંગ્રેસ સંયોજકની બેઠકમાં હાજરી આપશે તેવી શક્યતા છે.

• આગામી દિવસોમાં રાહુલ ગાંધી ગુજરાત આવે તેવી શક્યતા
• ગુજરાત કોંગ્રેસમાં મજબૂત નેતૃત્વ માટે આવી શકે છે ગુજરાત
• ઑકટોબરમાં મળશે કોંગ્રેસ સંયોજકની બેઠક

અમદાવાદ: આગામી દિવસોમાં રાહુલ ગાંધી ગુજરાતની મુલાકાતે આવે તેવી શક્યતાઓ વ્યક્ત કરવામાં આવી રહી છે. ગુજરાત ભાજપે ગુજરાતમાં સત્તા પરિવર્તન કર્યું છે તો બીજી તરફ કોંગ્રેસે પંજાબમાં પોતાની સરકારનું સત્તા પરિવર્તન કર્યું છે. કોંગ્રેસે ભાજપના પરિવર્તનના નિર્ણય બાદ પંજાબમાં સત્તા પરિવર્તનનું મન બનાવ્યું હતું તેવું લાગી રહ્યું છે. વળી સત્તાધારી પક્ષ સાથે કોંગ્રેસના નેતાઓની સાંઠગાંઠ પણ આંખે ઉડીને આવે તેવી છે, જેના કારણે ગુજરાત કોંગ્રેસમાં ધરમૂળમાંથી પરિવર્તનની જરૂર દેખાઈ રહી છે.

ઑક્ટોબરમાં સંયોજક દળની બેઠક

આગામી ઑક્ટોબર મહિનામાં કોંગ્રેસની સંયોજક દળની બેઠક મળવાની છે. આ બેઠકમાં ભાગ લેવા માટે થઈને કોંગ્રેસના નેતા રાહુલ ગાંધી ગુજરાત આવે તેવી શક્યતાઓ વ્યક્ત કરવામાં આવી રહી છે. છેલ્લા કેટલાક સમયથી ગુજરાત કોંગ્રેસના પ્રમુખ અને વિપક્ષના નેતાઓને લઇને અનેક અટકળો ચાલી રહી છે. આવામાં કહેવામાં આવી રહ્યું છે કે કોંગ્રેસ હાઇકમાન્ડ કઠોર નિર્ણય કરી શકે છે. બીજી તરફ પંજાબમાં આંતરિક વિખવાદાના કારણે કોંગ્રેસ હાઇકમાન્ડે સત્તા પરિવર્તન કર્યું છે, ત્યારે હવે ગુજરાત કોંગ્રેસની કમાન પણ યુવા નેતાઓને સોંપવામાં આવે તેવી પ્રબળ શક્યતાઓ છે.

રાહુલ ગાંધીને બેઠક અંગે પાઠવવામાં આવ્યું આમંત્રણ

આગામી દિવસોમાં મળનારી સંયોજકની બેઠકમાં બૂથ લેવલના મેનેજમેન્ટ માટે થઈ રાહુલ ગાંધીને આમંત્રણ આપવામાં આવ્યું છે. રાહુલ ગાંધી આમંત્રણ સ્વીકારે ત્યારબાદ સત્તાવાર રીતે ગુજરાત કોંગ્રેસ રાહુલ ગાંધીના ગુજરાત પ્રવાસ અંગે જાહેરાત કરશે.

વધુ વાંચો: કોણ બનશે ગુજરાત કોંગ્રેસના નવા પ્રભારી?

વધુ વાંચો: આ દિગ્ગજ નેતાને સોંપવામાં આવી શકે છે ગુજરાત કોંગ્રેસની જવાબદારી