અમદાવાદ: આ અંગે ડૉ. એમ.એમ.પ્રભાકરે જણાવ્યું હતું કે, આ ઓપરેશન થિયેટર વડે સિવિલ હોસ્પિટલમાં સારવાર માટે આવનાર દર્દીઓને શ્રેષ્ઠ સુવિધાઓ પૂરી પાડી શકાશે. ઈએનટી અને પ્લાસ્ટિક સર્જરી વિભાગ માટે અત્યાધુનિક ઓપરેશન થિયેટર કાર્યરત કરાયું છે.
આ સાથે જ સિવિલ સુપ્રિટેન્ડન્ટ ડૉ. જે.પી.મોદીએ જણાવ્યું હતું કે, ખુલ્લુ મૂકવામાં આવેલું આ ઓપરેશન થિયેટર ખુબ જ અત્યાધુનિક છે. ઓટોમેટેડ સેન્સર ઓરિએન્ટેડ ડોર, સેન્સર સેક્શન યુનિટ, કોલ્ડ શેડો લાઈટ એટલે કે ઓપરેશન કરતી વખતે પડછાયો ના પડે તેવી લાઈટ, લેમિનાર એરફ્લો, સેન્ટ્રલ એસી, ફોક્સ લાઈટ, જોઈન્ટલેસ ફિલોરિંગ સહિતની અદ્યતન સુવિધાઓ આપવામાં આવી છે.
આ ઉપરાંત દરેક ડૉક્ટર્સ માટે કન્સલ્ટિંગ રૂમ તેમજ સ્ટોરેજ રૂમની પણ વ્યવસ્થા કરવામાં આવી છે. આ અગાઉ ટ્રોમા સેન્ટર ખાતે સાત ઓપરેશન થિયેટર કાર્યરત હતા આજે બીજા પાંચ શરૂ થતાં કુલ 12 ઓપરેશન થિયેટર કાર્યરત કરવામાં આવ્યા છે.
ઉલ્લેખનીય છે કે, ગત વર્ષે જ ટ્રોમા સેન્ટરના ચોથા માળે ઓર્થોપેડિક ડિપાર્ટમેન્ટ માટે ઓપરેશન થિયેટર શરૂ કરાયુ હતું. ટૂંક સમયમાં જ સર્જરી વિભાગ માટે પણ અત્યાધુનિક સુવિધાઓથી સજ્જ ઓપરેશન થિયેટર શરૂ કરવામાં આવશે.
