- નરોડા વિસ્તારમાં એક યુવતીનો ચોંકાવનારો વીડિયો સામે આવ્યો
- યુવતીને થાંભલા સાથે બાંધીને માર મારવામાં આવી રહ્યો હોવાનું દેખાય
- યુવતીએ લૂંટ કરવાનો પ્રયાસ કરતા લોકોએ માર માર્યો
અમદાવાદ: શહેરનાં નરોડા વિસ્તારમાં એક યુવતીનો ચોંકાવનારો વીડિયો સામે આવ્યો છે. જેમાં એક યુવતીને થાંભલા સાથે બાંધીને માર મારવામાં આવી રહ્યો હોવાનું દેખાય છે. વીડિયો વાઈરલ થયા બાદ પોલીસ દોડતી થઇ છે અને આ અંગે કાર્યવાહી પણ શરૂ કરી દીધી છે. મળતી માહિતી અનુસાર આ વીડિયો નરોડા વિસ્તારમાં આવેલા નવકાર જ્વેલર્સની બહારનો છે.
આ પણ વાંચો: જૂનાગઢ પોલીસે 90 લાખ કરતા વધુની સોનાની ચોરીનો ભેદ ઉકેલ્યો
જ્વેલર્સના માલિક પર સ્પ્રે છાંટીને લૂંટનો પ્રયાસ કર્યો
વીડિયોમાં લોકો યુવતીને માર મારતા જોવા મળે છે. આ યુવતીએ દુકાનની અંદર લૂંટનો પ્રયાસ કર્યો હતો. ત્યારબાદ લોકોએ તેને પકડીને દોરડા વડે જ્વેલર્સની બહાર થાંભલા સાથે બાંધી દીધી હતી. મળતી માહિતી અનુસાર યુવતી સોનું લેવાના બહાને આવી હતી. પહેલા તે સોનું ખરીદવું હોય તે પ્રકારે પૂછપરછ કરે છે. પછી અચાનક બીજા હાથમાં રહેલો સ્પ્રે કાઢે છે અને જ્વેલર્સના માલિક પર છાંટીને લૂંટ કરવાનો પ્રયાસ કરે છે. જોકે તે સફળ નથી થતી અને પકડાય જાય છે.
આ પણ વાંચો: માંગરોળમાં સોની પાસેથી ચીલઝડપનો વીડિયો આવ્યો સામે, ફરિયાદ નોંધાવાઈ
બન્ને પક્ષો દ્વારા સામસામે ફરિયાદ દાખલ થઈ
જોકે આ વીડિયો વાઈરલ થયા બાદ પોલીસ દોડતી થઇ છે. સમગ્ર મામલે તપાસ આદરી છે. બન્ને પક્ષો દ્વારા સામસામે ફરિયાદ દાખલ કરવામાં આવી છે. પોલીસ અધિકારીના અનુસાર યુવતી સામે લૂંટની ફરિયાદ દાખલ કરવામાં આવી છે. બીજી તરફ યુવતીએ પણ માર મારવા અંગે પોલીસ ફરિયાદ કરી છે. બન્ને કેસની તપાસ બાદ ધરપકડ કરવામાં આવશે તેમજ યોગ્ય કાર્યવાહી કરવામાં આવશે તેવું પોલીસે જણાવ્યું છે.
