- હવે રેલવે વિભાગ પણ આવ્યું અમદાવાદ શહેરની મદદે
- રેલવે દ્વારા કુલ 19 આઇસોલેશન કોચ કરાયા તૈયાર
- ચાંદલોડિયા રેલવે સ્ટેશને 6 અને સાબરમતી રેલવે સ્ટેશનમાં 13 કોચ ઉપલબ્ધ
અમદાવાદ: અત્યારની પરિસ્થિતિમાં કોરોના સામેના યુદ્ધમાં પશ્ચિમ રેલ્વે દ્વારા પણ ભાગીદારી આપવામાં આગળ આવ્યું છે. મંડળ રેલ પ્રબંધક દિપક કુમાર ઝાએ જણાવ્યું હતું કે આ પડકારજનક સમયમાં અને આ મહામારી સામેની લડતમાં રેલવે હંમેશા અગ્રણી રહી છે. સ્થાનિક પ્રશાસનની વિનંતી પર ટૂંક સમયમાં આ 19 કોચ તૈયાર કરવામાં આવ્યા છે અને તેમને ઉપલબ્ધ કરાયા છે. તેમાંથી 13 કોચ સાબરમતી સ્ટેશનના પ્લેટફોર્મ નંબર 5 અને ચાંદલોડિયામાં પ્લેટફોર્મ નંબર 2 પર 6 કોચ મૂકવામાં આવ્યા છે તથા જ્યારે જરૂરી હોય ત્યારે કોચની સંખ્યા પણ વધારી શકાય છે.
કોચમાં કેવી છે સુવિધા
મંડળ રેલ પ્રબંધક દિપક કુમાર ઝાએ જણાવ્યું હતું કે આ કોચમાં તમામ જરૂરી સુવિધાઓ પૂરી પાડવાનો પ્રયાસ કરવામાં આવ્યો છે. પ્રત્યેક કોચમાં 8 વોર્ડ બનાવવામાં આવ્યા છે જેમાં 16 દર્દીઓ રહી શકે છે. દરેક વોર્ડમાં 2 દર્દીઓ માટેની સુવિધા રહેશે. એક વોર્ડમાં મેડિકલ અને પેરામેડિકલ સ્ટાફ રહેશે. દરેક કોચમાં બે ઑક્સિજન સિલિન્ડર આપવામાં આવ્યા છે. તેના રિફિલિંગની વ્યવસ્થા સ્થાનિક પ્રશાસન કરશે. દરેક વોર્ડમાં બેડશીટ્સ, પિલો કવર સહિતની અને ત્રણ પ્રકારનાં ડસ્ટબિન (લાલ, પીળો, લીલો) હશે જે વેસ્ટ સેગ્રીગેશન સરળ બનાવશે. કોચની બંને બાજુની બારી મચ્છરદાનીથી ઢંકાયેલી છે અને બાથરૂમમાં જરૂરી સુવિધા પૂરી પાડવામાં આવી છે.
વધુ વાંચો: પશ્ચિમ રેલવે દ્વારા પહેલી ઓક્સિજન એક્સપ્રેસ ટ્રેન દોડાવવામાં આવી
દરેક કોચમાં થશે કુલરની વ્યવસ્થા કરવામાં આવશે
દરેક કોચમાં આપાતકાલીન પરિસ્થિતિઓથી બચાવવા માટે બે ફાયર ફાઈટિંગ સાધનો રાખવામાં આવ્યા છે. સ્થાનિક પ્રશાસન દ્વારા આ કોચમાં દાખલ દર્દીઓ માટે દવાઓ અને અન્ય તબીબી ઉપકરણો તથા મેડિકલ ટીમ ઉપલબ્ધ કરવામાં આવશે. કોચમાં ઠંડક જળવાઈ રહે તે માટે રૂફટોપ પર પાટની બોરીઓ મૂકીને સતત પાણીનો છંટકાવ કરવામાં આવી રહ્યો છે અને દર્દીઓ પરેશાન ન થાય તે માટે દરેક વોર્ડમાં એક કુલર લગાવવામાં આવ્યું છે. આ કોચનું વધુ સારું સંકલન જાળવવા રેલ્વે વતી અતુલ ત્રિપાઠી સહાયક વાણિજ્ય પ્રબંધક અને એ.એમ.સી. વતી કિરણ વનાલીયા નોડલ અધિકારી તરીકે નિયુક્ત કરવામાં આવ્યા છે.
વધુ વાંચો: કાલુપુર રેલવે સ્ટેશન પર RPF દ્વારા કોરોનાથી સુરક્ષિત રહેવા જાગૃતિ અભિયાન
