ન્યૂયોર્ક: ભારત અને કેનેડા વચ્ચે રાજદ્વારી અને આર્થિક મડાગાંઠ વચ્ચે અમેરિકન અખબાર ન્યૂયોર્ક ટાઈમ્સે એક મોટો ખુલાસો કર્યો છે. અમેરિકન અખબાર અનુસાર કેનેડાની સરકારે અમેરિકન ગુપ્તચર એજન્સીઓ પાસેથી મળેલી માહિતીના આધારે ભારત સરકાર પર ગંભીર આરોપો લગાવ્યા છે. અખબારમાં છપાયેલા સમાચાર અનુસાર, ખાલિસ્તાની નેતા હરદીપ સિંહ નિજ્જરની હત્યા બાદ અમેરિકન ગુપ્તચર એજન્સીઓએ કેનેડાની સરકારને આ અંગે મહત્વપૂર્ણ માહિતી આપી હતી. જે બાદ કેનેડાની સરકાર એવા નિષ્કર્ષ પર આવી કે ભારત સરકાર તેના કથિત નાગરિકની હત્યામાં સામેલ છે.
અમેરિકન એજન્સીઓએ કરી મદદ: અખબારે પોતાના અહેવાલમાં કહ્યું છે કે 18 જૂને બ્રિટિશ કોલંબિયામાં એક શીખ મંદિરની બહાર નિજ્જરની હત્યા કરવામાં આવી હતી. જે બાદ અમેરિકન જાસૂસી એજન્સીઓએ તેમના કેનેડિયન સમકક્ષોને આ હત્યાના કેટલાક પુરાવા રજૂ કર્યા હતા. જેણે કેનેડાને આ ઘટના પાછળ ભારત સરકારનો હાથ હોવાનું તારણ કાઢવામાં મદદ કરી.
અખબારી રિપોર્ટ બાદ ચર્ચા: અખબારે આ સમગ્ર પ્રક્રિયામાં સામેલ બે અધિકારીઓને ટાંકીને કહ્યું કે અમેરિકન ગુપ્તચર એજન્સીઓ પાસેથી માહિતી મળ્યા બાદ કેનેડાની સરકારે આ મામલે વધુ તપાસ કરી. તપાસ પછી, કેનેડિયન ગુપ્તચર એજન્સીએ વધુ નક્કર પુરાવા એકઠા કર્યા જેના પરથી સ્પષ્ટ નિષ્કર્ષ કાઢી શકાય કે આ પાછળ કોણ છે. જો કે અખબારે તે અધિકારીઓની ઓળખ જાહેર કરી નથી અને એ પણ સ્પષ્ટ કરવામાં આવ્યું નથી કે આ અધિકારીઓ અમેરિકન ઈન્ટેલિજન્સ વિભાગ સાથે સંકળાયેલા છે કે કેનેડાની સરકાર સાથે.
'ફાઇવ આઇઝ ભાગીદારો વચ્ચે વહેંચાયેલી ગુપ્ત માહિતી': અહેવાલ કેનેડામાં યુએસ એમ્બેસેડર ડેવિડ કોહેનના દાવા સાથે મેળ ખાય છે કે કેનેડાના વડા પ્રધાન જસ્ટિન ટ્રુડોનો ભારત સામેનો આરોપ 'ફાઇવ આઇઝ ભાગીદારો વચ્ચે વહેંચાયેલી ગુપ્ત માહિતી' પર આધારિત હતો. કેનેડા ઉપરાંત, ફાઈવ આઈ ઈન્ટેલિજન્સ શેરિંગ નેટવર્ક યુએસ, યુકે, ઓસ્ટ્રેલિયા અને ન્યુઝીલેન્ડનું બનેલું છે. તેની સ્થાપના 1946માં થઈ હતી.
વ્હાઇટ હાઉસ તરફની કોઈ ટિપ્પણી નહિ: અખબારે તેના અહેવાલમાં કહ્યું છે કે તેણે આ મામલે વ્હાઇટ હાઉસના પ્રવક્તાનો સંપર્ક કરવાનો પ્રયાસ કર્યો હતો પરંતુ તેણે આ અંગે ટિપ્પણી કરવાનો ઇનકાર કર્યો હતો. રિપોર્ટ અનુસાર, અમેરિકન અધિકારીઓ આ હત્યા અંગે ચર્ચા કરવામાં આનાકાની કરી રહ્યા છે કારણ કે અમેરિકા તેના બે સહયોગી દેશો વચ્ચે સારું સંતુલન જાળવવા માંગે છે.
