- શંકાસ્પદ ગાડી કેસમાં વપરાયેલી કારના માલિકનું મોત
- દેવેન્દ્ર ફડણવીસે તપાસ રાષ્ટ્રીય તપાસ એજન્સી (NIA)ને સોંપવાની કરી માગ
- કાર ઇસ્ટર્ન એકપ્રેસ હાઇ-વે પરથી ચોરી થઇ હતી
મુંબઇ : મુકેશ અંબાણીના ઘરની બહાર જીલેટીન સ્ટિક સાથે મળી આવેલી કારના માલિક મનસુખ હિરેન થાણે ખાતેથી મૃત હાલતમાં મળી આવ્યા છે. ઉલ્લેખનીય છે કે, 25 ફેબ્રુઆરીએ મુકેશ અંબાણીના ઘરની નજીક એક શંકાસ્પદ કાર ઉભી હોવાનું જાણવા મળ્યું હતું. આ શંકાસ્પદ વાહનમાંથી 20 જીલેટીન સ્ટિક મળી આવી હતી. આ સ્ટિકનો ઉપયોગ વિસ્ફોટક બનાવવા માટે કરવામાં આવે છે. શુક્રવારે ભાજપના નેતા દેવેન્દ્ર ફડણવીસે મહારાષ્ટ્ર વિધાનસભામાં ઉદ્યોગપતિ મુકેશ અંબાણીના ઘર નજીક વિસ્ફોટકથી ભરેલી કારની ઘટનાની તપાસ રાષ્ટ્રીય તપાસ એજન્સી (NIA)ને સોંપવાની માગ કરી છે. રાજ્યમાં કાયદો અને વ્યવસ્થાના મુદ્દે વિધાનસભામાં ચર્ચા દરમિયાન તેમને આ અંગે માગ કરી હતી.
દેવેન્દ્ર ફડણવીસનો દાવો - વાહનના માલિક ક્રેવફોર્ડ માર્કેટમાં એક વ્યક્તિને મળ્યા હતા
વિધાનસભાના વિપક્ષી નેતાએ જણાવ્યું હતું કે, વાહનના માલિક અને પોલીસ અધિકારી વચ્ચે ટેલિફોન વાતચીત થઈ છે. સ્થાનિક પોલીસ સ્ટેશનના કર્મચારીઓ અને ક્રાઈમ બ્રાંચના અધિકારીઓની જગ્યાએ પોલીસ અધિકારી તે સ્થળે પહોંચ્યા હતા. દેવેન્દ્ર ફડણવીસે દાવો કર્યો કે, વાહનના માલિક ક્રેવફોર્ડ માર્કેટમાં એક વ્યક્તિને મળ્યા હતા. તેમને કોણ હતા? વાહનનો માલિક થાણે રહે છે અને સ્થળ પર પહોંચેલા પહેલા પોલીસ અધિકારી પણ થાણેમાં જ રહે છે. આ રીતે ઘણા સંયોગો શંકા પેદા કરે છે અને તેથી તપાસ NIAને સોંપવી જોઈએ. ઉલ્લેખનીય છે કે, ગત અઠવાડિયે, રિલાયન્સ ઇન્ડસ્ટ્રિઝના પ્રમુખ અંબાણીના નિવાસસ્થાન, એન્ટિલિયા નજીક એક એસયુવી (સ્પોર્ટ્સ યુટિલિટી વ્હિકલ) જિલેટીન સ્ટિક મળી આવી હતી.
ભારતના કોઈ ઉદ્યોગપતિ સાથે અમારે કોઈ દુશ્મનાવટ નથી - જૈશ ઉલ હિંદ
28 ફેબ્રુઆરીએ આતંકી સંગઠન જૈશ ઉલ હિંદે આ અંગે જવાબદારી લીધી હતી. આ સાથે 1 માર્ચે આતંકવાદી સંગઠન પોતાના નિવેદનથી પલટાઇ ગયું હતું. જૈશ ઉલ હિંદે જણાવ્યું હતું કે, અમારી લડત ભાજપ અને RSS સાથે છે. અંબાણીને અમારી તરફથી કોઈ ધમકી અપાઇ નથી. ભારતના કોઈ ઉદ્યોગપતિ સાથે અમારે કોઈ દુશ્મનાવટ નથી. અમારી લડત નરેન્દ્ર મોદી સાથે છે, જે ભારતના મુસ્લિમોને સતાવી રહ્યા છે.
જાણો સમગ્ર ઘટનાની વિગતો
મુકેશ અંબાણીના ઘર નજીક વિસ્ફોટક ભરેલી ગાડી મળી આવી
મુંબઈમાં ઉદ્યોગપતિ મુકેશ અંબાણીના ઘર નજીક વિસ્ફોટકોથી ભરેલી ગાડી મળી આવી છે. મહારાષ્ટ્રના ગૃહ પ્રધાન અનિલ દેશમુખે કહ્યું કે, એન્ટિલિયાની બહાર પાર્ક કરેલી એક શંકાસ્પદ કારમાંથી જિલેટીન મળી આવ્યા છે. મુંબઈ પોલીસની ટીમ સ્થળ ઉપર પહોંચી તપાસ કરી રહી છે.
મુકેશ અંબાણીના ઘર એન્ટિલિયાની બહાર શંકાસ્પદ કારમાંથી વિસ્ફોટક જિલેટીન મળ્યું
દેશના સૌથી ધનિક ઉદ્યોગપતિ મુકેશ અંબાણીના નિવાસસ્થાન એન્ટિલિયાની બહાર શંકાસ્પદ કાર અને 20 જિલેટીન સડીઓ મળી આવી છે. મુંબઈ પોલીસની ટીમ ઘટના સ્થળે પહોંચી ગઈ હતી અને અંબાણીના ઘરની નજીકમાં ઘણી સુરક્ષા ગોઠવવામાં આવી છે.
શંકાસ્પદ ગાડી કેસઃ મુંબઇ ક્રાઇમ બ્રાન્ચને મળ્યા મહત્વના પુરાવા
ઉદ્યોગપતિ મુકેશ અંબાણીના ઘરની બહાર દારૂગોળો ભરેલી સ્કોર્પિયો ઊભી રાખનારા આરોપીની ઓળખ થઈ ચૂકી છે. આ અંગેની માહિતી સૂત્રો તરફથી પ્રાપ્ત થઈ છે. આ સ્કોર્પિયોની પાછળ એક સફેદ રંગની ઈનોવા કાર મુંબઈ પોલીસે શોધી કાઢી છે. મુંબઈ પોલીસે તેની મદદથી જ મુખ્ય આરોપી સુધી પહોંચવાની તૈયારી કરી છે. ક્રાઈમબ્રાન્ચ ઝડપથી જ મુખ્ય આરોપીને પકડવાનો દાવો કરી રહી છે.
મુકેશ અંબાણીના ઘરની બહાર મળેલી શંકાસ્પદ કાર મામલે જૈશ ઉલ હિંદે જવાબદારી સ્વીકારી
મુકેશ અંબાણીના ઘર એન્ટિલિયા બાહર મળેલી શંકાસ્પદ કાર મામલે તપાસ મુંબઇ ક્રાઇમ બ્રાન્ચ દ્વારા કરવામાં આવી રહી છે. આ કાર ઇસ્ટર્ન એકપ્રેસ હાઇ-વે પરથી ચોરી થઇ હતી. જેની ફરિયાદ કાર માલિકે વિક્રોલી પોલીસ સ્ટેશનમાં નોંધાવામાં આવી હતી. આ સમગ્ર મામલે મુંબઇ પોલીસની 10 ટીમ કામ કરી રહી છે.
