મુંબઈ: એક 30 વર્ષની મહિલાએ ઉદ્યોગપતિ સજ્જન જિંદાલ પર લગ્નનું વચન આપીને બળાત્કાર કરવાનો આરોપ લગાવ્યો છે. અબજોપતિ ઉદ્યોગપતિએ રવિવારે આ આરોપને નકારી કાઢ્યો હતો. મહિલાની સોશિયલ મીડિયા પ્રોફાઇલમાં તેને અભિનેત્રી તરીકે દર્શાવવામાં આવી છે. તેણીએ દાવો કર્યો હતો કે તેણી થોડા વર્ષો પહેલા દુબઈમાં એક ક્રિકેટ મેચ દરમિયાન JSW ગ્રુપના ચેરમેન અને મેનેજિંગ ડિરેક્ટર જિંદાલ (64)ને મળી હતી, જે મિત્રતામાં પરિણમી હતી અને ઉદ્યોગપતિ પાછળથી તેના તરફ આકર્ષાયા હતા.
મુંબઈની રહેવાસી મહિલાએ દાવો કર્યો છે કે આ વર્ષે 24 જાન્યુઆરીએ JSW ગ્રુપ હેડક્વાર્ટરની અંદર કથિત જાતીય સતામણી થઈ હતી. તેણીએ કહ્યું કે ઉદ્યોગપતિએ તેની સાથે લગ્ન કરવાનું વચન આપ્યું હતું. તેણીએ 16 ફેબ્રુઆરીએ પોલીસનો સંપર્ક કર્યો, અને 13 ડિસેમ્બરે મુંબઈના BKC પોલીસ સ્ટેશનમાં IPC કલમ 376, 354 અને 506 હેઠળ FIR દાખલ કરવામાં આવી હતી.
રવિવારે સાંજે જારી કરાયેલા એક નિવેદનમાં જિંદાલે આરોપોને ખોટા અને પાયાવિહોણા ગણાવ્યા હતા. તેમણે કહ્યું હતું કે તે સમગ્ર તપાસમાં સંપૂર્ણ સહયોગ આપવા માટે પ્રતિબદ્ધ છે. તપાસ ચાલુ હોવાથી અમે આ તબક્કે વધુ ટિપ્પણી કરવાનું ટાળીશું.
30 વર્ષીય મહિલાએ દાવો કર્યો છે કે તે જિંદાલને પહેલીવાર દુબઈ સ્ટેડિયમના વીઆઈપી બોક્સમાં મળી હતી, જ્યાં તેઓએ સંપર્ક નંબરોની આપ-લે કરી હતી. તેણી દાવો કરે છે કે તેણી બાદમાં જિંદાલને ઉપનગરીય બાંદ્રાની એક સ્ટાર હોટલ અને દક્ષિણ મુંબઈમાં જિંદાલ મેન્શનમાં મળી હતી અને તેણી પર જાતીય શોષણ કરતા પહેલા કારમાં તેની સાથે ડ્રાઈવ પર પણ ગઈ હતી. એફઆઈઆરમાં તેણે ઉલ્લેખ કર્યો છે કે જાતીય સતામણી બાદ જિંદાલ કથિત રીતે તેનો સંપર્ક કરવાનું ટાળી રહ્યો છે.
