ન્યૂઝ ડેસ્કઃ હિન્દુ પંચાંગ-શાસ્ત્રોમાં 27 નક્ષત્રોમાં 8મું નક્ષત્ર પુષ્ય નક્ષત્ર ગણાય છે. પુષ્ય એ નક્ષત્રોના રાજા કહેવાય છે. પુષ્ય નક્ષત્રનો સ્વામી ગુરુ મહારાજ છે. ગુરુ મહારાજ એ શુભત્વનો કારક છે. ઘણાં ગ્રંથોમાં શની મહારાજને નક્ષત્રનો રાજા કહેવામાં આવે છે. થોડા દિવસો બાદ દિવાળીનો તહેવાર આવી રહ્યો છે, ત્યારે દિવાળી પહેલાના દિવસોમાં વિવિધ વેપાર-રોજગાર, ઉદ્યોગ સાથે સંકળાયેલા ક્ષેત્રોમાં હલચલ દેખાઇ રહી છે. એવામાં હવે શનિવારે પુષ્ય નક્ષત્રની સાથે દિવાળીની શુભ ખરીદીના શ્રીગણેશ થશે. શનિવારે સવારે 8:15 થી રવિવારે સવારે 8.46 વાગ્યા સુધી પુષ્ય નક્ષત્ર હોવાની સાથે જ સોના-ચાંદી, ચોપડા, વાહન સહિતની શુકનવંતી ખરીદી માટેનો શ્રેષ્ઠ અવસર છે.
પુષ્ય નક્ષત્રમાં કરેલાં કોઇપણ કાર્યમાં હરહંમેશ સફળતા અને સિદ્વિઓ પ્રાપ્ત થાય છે. તેથી જ લગ્ન સિવાયના દરેક શુભ કાર્ય માટે પુષ્ય નક્ષત્રને ઇચ્છનીય ગણવામાં આવે છે. દિવાળીના દિવસોમાં ચોપડા ખરીદવા માટે વેપારીઓ પુષ્ય નક્ષત્રને વિશેષ મહત્વ આપે છે. આ ઉપરાંત ખાસ કરીને વર્ષ દરમિયાન પણ પુષ્યનક્ષત્રમાં જ્યારે ગુરુ પુષ્યામૃત યોગ હોય ત્યારે સોનું, ઝવેરાત, રત્નો ખરીદવાની પ્રથા વર્ષોથી પ્રચલિત છે.
પુષ્ય નક્ષત્રના દિવસે કરાતા માંગલિક કાર્યોઃ
- આ નક્ષત્ર દરમિયાન ઘરમાં આવેલી સંપત્તિ કે સમૃદ્વિ ચિરસ્થાયી રહે છે
- આ દિવસે આધ્યાત્મિક કાર્યો કરી શકાય
- મા લક્ષ્મીની ઉપાસના તેમજ શ્રી યંત્ર ખરીદીને જીવનમાં સમૃદ્વિ લાવી શકાય
- કુંડળીમાં રહેલા દુષિત સૂર્યના દુષ્પ્રભાવને ઘટાડી શકાય
- આ શુભ દિને મહાલક્ષ્મી સાધના કરવાથી તેનું વિશેષ રીતે મનોવાંચ્છિત ફળ મળે છે
પુષ્યનક્ષત્રના શુભ મૂર્હુતો
શનિવારે તારીખ 7 ના મૂર્હુતો
- શુભઃ સવારે 08:14 થી 9:30 સુધી
- ચલ-લાભ-અમૃત: બપોરે 12:24 થી 4:30 સુધી
- લાભઃ સાંજે 6:00 થી7:30 સુધી
- શુભઃ રાત્રે 9:00 થી 12: 23 સુધી
રવિવાર તારીખ 8 ના મૂર્હુતો
- લાભઃ સવારે 07:00 થી 08:46 સુધી
રવિ પુષ્ય યોગ
પુષ્યનક્ષત્રમાં આ વર્ષે રવિયોગ અને રવિ પુષ્ય યોગ છે. રવિ પુષ્ય યોગ વિશે કહેવામાં આવે છે કે, કુયોગની અશુભતાને આ યોગ દૂર કરે છે. તમામ નક્ષત્રોમાં સૌથી શુભ અને શ્રેષ્ઠ યોગ પુષ્ય નક્ષત્રને માનવામાં આવે છે. અભિજીત મૂર્હુતને નારાયણના સુદર્શન ચક્ર તરીકે ગણવામાં આવે છે.
