બેંગલુરુ: પદ્મભૂષણથી સન્માનિત જાણીતા લેખક એસએલ ભૈરપ્પાએ ગુરુવારે કહ્યું કે, જો કોઈ સર્જકની કૃતિની પ્રાસંગિકતા તેમના મૃત્યુ પછી પણ જળવાઈ રહે તો તે એક મોટો પુરસ્કાર છે. પદ્મ ભૂષણ સન્માન માટે પસંદ થવા પર ખુશી વ્યક્ત કરતા તેમણે કહ્યું કે, નરેન્દ્ર મોદી વડાપ્રધાન હોવાને કારણે તેમને આ એવોર્ડ મળ્યો છે.
આ પણ વાંચો: Republic day 2023: રામોજી ફિલ્મ સિટી ખાતે 74મા પ્રજાસત્તાક દિવસની ભવ્ય ઉજવણી કરવામાં આવી
પત્રકારો સાથે વાત કરતાં કહી આ વાત: એક પ્રશ્નના જવાબમાં ભૈરપ્પાએ કહ્યું, "હું એટલું જ કહી શકું છું કે મોદી વડાપ્રધાન છે, તેથી જ મને આ એવોર્ડ મળ્યો છે, નહીં તો મને આ મળ્યો ન હોત. ખબર નહીં કેમ પહેલા નહીં." અહીં પત્રકારો સાથે વાત કરતાં તેમણે કહ્યું કે, 'એવોર્ડ્સ આવતા-જતા રહે છે, કોઈ લેખકને કયો એવોર્ડ મળ્યો છે તે કોઈ જોશે નહીં, જો વાચકોને તેમના પુસ્તકોમાં રસ હશે તો તેઓને તે ગમશે. લેખકનું મૃત્યુ કોઈને કોઈ દિવસ થઈ શકે છે, પરંતુ મહત્ત્વની વાત એ છે કે, તેમનું પુસ્તક તેમના મૃત્યુ પછી પણ સુસંગત રહેશે કે કેમ? ભૈરપ્પા એક પ્રતિષ્ઠિત કન્નડ લેખક છે જેમની કૃતિઓ 14 થી વધુ ભાષાઓમાં અનુવાદિત થઈ છે. તેમને પદ્મશ્રી, સરસ્વતી સન્માન, સાહિત્ય અકાદમી પુરસ્કાર વગેરેથી સન્માનિત કરવામાં આવ્યા છે.
પદ્મભૂષણ મળવા બદલ ખુશી વ્યક્ત કરી: વરિષ્ઠ નેતા અને કર્ણાટકના પૂર્વ મુખ્યમંત્રી એસએમ કૃષ્ણાને પણ પદ્મભૂષણથી સન્માનિત કરવામાં આવ્યા હતા. તેમણે દેશના બીજા સર્વોચ્ચ નાગરિક પુરસ્કાર પદ્મભૂષણ માટે પસંદ થવા પર ખુશી વ્યક્ત કરી અને કહ્યું કે, તેઓ આ સન્માન રાજ્યના લોકોને સમર્પિત કરશે. કૃષ્ણા (90)એ વડાપ્રધાન નરેન્દ્ર મોદીનો આભાર માન્યો અને કહ્યું કે, તેઓ સન્માન સ્વીકારવા માટે અભિભૂત થયા છે. તેમણે કહ્યું, 'મારા માતા-પિતાને આનંદ થશે કે વડા પ્રધાન અને ગૃહ પ્રધાને મને આ પ્રતિષ્ઠિત સન્માન આપવાનું યોગ્ય માન્યું. હું ભારત સરકારનો આભારી છું અને કર્ણાટકના લોકોનો પણ આભારી છું.
