નવી દિલ્હી: ચૂંટણી પંચે બુધવારે રાષ્ટ્રવાદી કોંગ્રેસ પાર્ટી (NCP) ના બંને પ્રતિસ્પર્ધી જૂથોને પક્ષના નામ અને સત્તાવાર પ્રતીકને લગતી નોટિસનો જવાબ આપવા માટે ત્રણ અઠવાડિયાનો સમય આપ્યો છે. એક જૂથનું નેતૃત્વ શરદ પવાર કરે છે અને બીજા જૂથનું નેતૃત્વ તેમના ભત્રીજા અજિત પવાર કરે છે. બંનેએ પાર્ટીના નામ અને સત્તાવાર ચૂંટણી ચિન્હના દાવા પર ચૂંટણી પંચની નોટિસનો જવાબ આપવા માટે ચાર અઠવાડિયાનો સમય માંગ્યો હતો.
NCP અસલી બોસ કોણ?: 27 જુલાઈના રોજ કમિશને બંને હરીફ જૂથોને નોટિસ જારી કરી છે. 5 જુલાઈના રોજ ચૂંટણી પંચને 40 સાંસદો, ધારાસભ્યો અને વિધાન પરિષદના સભ્યોની એફિડેવિટ તેમજ બળવાખોર જૂથના સભ્યોની દરખાસ્ત મળી હતી કે તેઓએ અજિત પવારને NCPના વડા તરીકે પસંદ કર્યા છે. આ અંગેનો પત્ર 30 જૂને લખવામાં આવ્યો હતો. બે દિવસ અગાઉ અજિત પવારે એનસીપીમાં આશ્ચર્યજનક બળવો કર્યો હતો અને આઠ પ્રધાનો સાથે મહારાષ્ટ્રના નાયબ મુખ્ય પ્રધાન તરીકે શપથ લીધા હતા.
શરદ પવારનું નિવેદન: આ સાથે જ શરદ પવારે કહ્યું કે દેશની સત્તા ભારતીય જનતા પાર્ટી અને તેના સહયોગીઓ પાસે છે. આ બધાની ભૂમિકા સમાજમાં એકતા જાળવવાની છે, પરંતુ આ લોકો એકબીજા સાથે લડી રહ્યા છે. આ સરકારે ઘણા રાજ્યોની સરકારોને ઉથલાવી દીધી છે. જેમ કે- ગોવા, મધ્યપ્રદેશ અને મહારાષ્ટ્રમાં. મહારાષ્ટ્રની ઉદ્ધવ સરકારને પછાડ્યા પછી શું થયું તે આપણે બધાએ જોયું છે. શરદ પવારે કહ્યું કે ચૂંટણી પંચે મારી પાર્ટીને લઈને નોટિસ આપી છે. મારે ચિંતા કરવાની જરૂર નથી. હું સ્પષ્ટ કરવા માંગુ છું કે કેન્દ્રની મોદી સરકારના કેટલાક લોકોએ ઉદ્ધવ ઠાકરેની શિવસેના પાર્ટી પર કમિશનના નિર્ણયનો વિરોધ કર્યો હતો. આપણી સાથે પણ આવું થઈ શકે છે.
