નવી દિલ્હી: ગુપ્તચર વિભાગની માહિતીના આધારે, આવી એપ્સની યાદી તૈયાર કરવામાં આવી હતી જેનો ઉપયોગ આતંકવાદી સંગઠનો દ્વારા તેમના ષડયંત્રો રચવા માટે કરવામાં આવતો હતો. આ એપ્સ પાકિસ્તાનથી ઓપરેટ કરવામાં આવી હતી.
જમ્મુ-કાશ્મીરમાં મોટા પાયે આતંક ફેલાવવા: ગુપ્તચર એજન્સીઓ પાસેથી ઈનપુટ મળ્યા બાદ કેન્દ્ર સરકારે 14 મેસેન્જર મોબાઈલ એપ્લીકેશનને બ્લોક કરી દીધી છે. મળતી માહિતી મુજબ, આ મેસેન્જર મોબાઈલ એપ્લીકેશનનો ઉપયોગ જમ્મુ-કાશ્મીરમાં મોટા પાયે આતંક ફેલાવવા માટે કરવામાં આવી રહ્યો હતો. આ મામલાની જાણકારી ધરાવતા સરકારના એક અધિકારીએ જણાવ્યું કે ગુપ્તચર એજન્સી પાસેથી મળેલી માહિતી અનુસાર, આ મોબાઈલ એપ્લિકેશનનો ઉપયોગ કાશ્મીરમાં આતંકવાદીઓ દ્વારા તેમના સમર્થકો અને ઓન-ગ્રાઉન્ડ વર્કર્સ (OGWs) સાથે વાતચીત કરવા માટે કરવામાં આવ્યો હતો.
નામ ન આપવાની શરતે, મંત્રાલયના એક અધિકારીએ જણાવ્યું હતું કે એજન્સીઓ ઓન-ગ્રાઉન્ડ વર્કર્સ (OGWs) અને આતંકવાદીઓ દ્વારા એકબીજા સાથે વાતચીત કરવા માટે ઉપયોગમાં લેવાતી ચેનલો પર નજર રાખે છે. કોમ્યુનિકેશનને ટ્રૅક કરતી વખતે, એજન્સીઓને જાણવા મળ્યું કે કેટલીક એવી મોબાઇલ એપ્લિકેશન્સ છે જે ભારતમાંથી કામ કરતી નથી અને તેમની હિલચાલને ટ્રેક કરવી મુશ્કેલ છે. આ પછી ઘાટીમાં કાર્યરત અન્ય ગુપ્તચર એજન્સીઓની મદદથી આવી એપ્સની યાદી તૈયાર કરવામાં આવી હતી.
14 મેસેન્જર મોબાઈલ એપ્લીકેશન: જેઓ રાષ્ટ્રીય સુરક્ષા માટે ખતરો પેદા કરી શકે છે અને ભારતીય કાયદાઓનું પાલન કરતા નથી. યાદી તૈયાર થયા બાદ મંત્રાલયને આ મોબાઈલ એપ્સ પર પ્રતિબંધ મૂકવાની વિનંતી કરવામાં આવી હતી. અધિકારીએ કહ્યું કે આ એપ્સને ઈન્ફોર્મેશન ટેક્નોલોજી એક્ટ, 2000ની કલમ 69A હેઠળ બ્લોક કરવામાં આવી છે. સૂત્રોએ જણાવ્યું કે આ એપ્સમાં Crypvisor, Enigma, SafeSwiss, Vikrame, Mediafire, Briar, Beechat, Nandbox, Conion, IMO, એલિમેન્ટ, સેકન્ડ લાઇન, જંગી, થ્રીમા વગેરેનો સમાવેશ થાય છે.
