નવી દિલ્હીઃ કોંગ્રેસ સાંસદ રાહુલ ગાંધી વાયનાડની મુલાકાતે છે. જનસભાને સંબોધિત કરતાં તેમણે કહ્યું કે હું થોડા સમય પહેલા મણિપુર ગયો હતો. હું 19 વર્ષથી રાજનીતિમાં છું અને મણિપુરમાં મેં જે અનુભવ્યું તે ક્યારેય બન્યું નથી. મોદી સરકાર પર પ્રહાર કરતા તેમણે કહ્યું કે મણિપુરમાં હજારો લોકો છે જેમણે આ સહન કર્યું છે. કોઈનું ઘર બાળવામાં આવ્યું છે, કોઈની બહેન પર બળાત્કાર થયો છે, તો કોઈના ભાઈ અને માતા-પિતાની હત્યા કરવામાં આવી છે. જાણે આખા મણિપુરમાં કોઈએ કેરોસીન ફેંકીને આગ લગાડી દીધી હોય...'
આદિવાસી લોકો સાથે લોકનૃત્ય કર્યું: કોંગ્રેસ નેતા રાહુલ ગાંધી વાયનાડની બે દિવસીય મુલાકાતે છે. સાંસદ તરીકે પુનઃસ્થાપિત થયા બાદ રાહુલ ગાંધીની તેમના સંસદીય ક્ષેત્ર વાયનાડની આ પ્રથમ મુલાકાત છે. મળતી માહિતી મુજબ ત્યાં જતા પહેલા કોંગ્રેસના પૂર્વ અધ્યક્ષે તમિલનાડુના ઉટી પાસેના મુથુનાડુ ગામમાં ટોડા આદિવાસી સમુદાયના સભ્યો સાથે લોકનૃત્ય કર્યું હતું. આજે વહેલી સવારે તેઓ રાજધાની નવી દિલ્હી ખાતેના તેમના નિવાસસ્થાનથી કેરળના વાયનાડમાં તેમના સંસદીય મતવિસ્તાર માટે રવાના થયા હતા.
અવિશ્વાસ પ્રસ્તાવ પરની ચર્ચામાં ભાગ લીધો: લોકસભા સચિવાલયે 4 ઓગસ્ટે તેમનું સભ્યપદ પુનઃસ્થાપિત કર્યું હતું. જે બાદ તેમણે લોકસભાના ચોમાસુ સત્ર દરમિયાન વિપક્ષ દ્વારા લાવવામાં આવેલા અવિશ્વાસ પ્રસ્તાવ પરની ચર્ચામાં પણ ભાગ લીધો હતો. મોદી સરનેમ કેસમાં સુપ્રીમ કોર્ટે તેમની સજા પર રોક લગાવી દીધી હતી, ત્યારબાદ તેમનું સભ્યપદ પુનઃસ્થાપિત કરવામાં આવ્યું હતું.
(ANI)
