નવી દિલ્હીઃ રેલવેએ 30 જૂન સુધીની યાત્રા માટે નિયમિત ટ્રેનોમાં કરાયેલા બધા જ જૂના બુકિંગને રદ કરવા અને ટિકિટના પૂરા પૈસા પરત કરવાનો નિર્ણય લીધો છે. રેલવેના એક આદેશમાં પહેલી મેથી શરૂ કરાયેલી શ્રમિક વિશેષ ટ્રેન સેવા અને 12 મેથી શરૂ કરાયેલી વિશેષ ટ્રેનોનું સંચાલન શરૂ રહેશે.
જે ટિકિટ રદ કરવામાં આવશે, તે લોકડાઉનના સમયમાં તે સમયે બુક કરાવવામાં આવી હતી, જ્યારે રેલવેએ જૂનમાં યાત્રીઓ માટે બુકિંગની અનુમતિ આપી હતી.
કોરોના વાઇરસના ફેલાવાને રોકવા માટે લાદવામાં આવેલા બંધને કારણે 25 માર્ચથી રેલવેએ નિયમિત મેલ, એક્સપ્રેસ, યાત્રી અને ઉપનગરીય સેવાઓ સ્થગિત કરી હતી.
આ પહેલા, નિયમિત ટ્રેનો માટે તમામ બુકિંગ 17 મે સુધી રોકવામાં આવ્યા હતા. દેશમાં લાગુ બંધના સમયને ત્રણ વખત વધારવામાં આવ્યો છે. ત્રીજી વાર વધારવામાં આવેલું લોકડાઉન 17 મે સુધી લાગુ રહેશે.
