ગોરખપુર સીટ પર ભાજપ અને યોગીની પ્રતિષ્ઠાને વિપક્ષ આપશે ટક્કર

ન્યૂઝ ડેસ્ક: લોકસભા ચૂંટણી 2019નો પ્રચાર અને મતદાન હવે ધીમે ધીમે તેના આખરી પડાવ તરફ ગતિ કરી રહ્યો છે. ચાર તબક્કાના મતદાન તો પૂર્ણ થઈ ગયા છે. ત્યારે યુપીની એક એવી સીટ કે જ્યાં રાજ્યના મુખ્યપ્રધાન યોગી આદિત્યનાથની પ્રતિષ્ઠાન દાવ પર છે. રાજયની ગોરખપુર સીટ ખૂબ ચર્ચામાં છે. કારણ કે, આ સીટ પરથી રાજ્યના મુખ્યપ્રધાન યોગી આદિત્યનાથ પાંચ વખત સાંસદ રહ્યા છે તથા આ સીટ ભાજપનો ગઢ માનવામાં આવી રહી છે. રાજ્યના મુખ્યપ્રધાન બન્યા બાદ યોગીએ આ સીટ પરથી રાજીનામું આપી દીધું હતું. પેટા ચૂંટણીમાં અહીં ગઠબંધન ઉમેદવાર નિષાદ પ્રવિણે અહીં જીત મેળવી હતી. હવે તો તેઓ પણ ભાજપમાં આવી ગયા છે તે હાલ ભાજપમાંથી સંત કબીરનગરથી ઉમેદવાર છે.

ભાજપે આ સીટ પરથી ભોજપુરી કલાકાર રવિ કિશનને મેદાનમાં ઉતાર્યા છે ત્યારથી તેઓ ખૂબ ચર્ચાઓમાં આવી રહ્યા છે, પ્રચારમાં પણ તેઓ મોદી અને યોગીના ગુણગાન ગાતા થાકતા નથી. અહીં આ સીટ પર ગઠબંધન ઉમેદવાર ભુઆલ નિષાદને મેદાને ઉતાર્યા છે તો કોંગ્રેસે પણ અહીં મધૂસુદન તિવારીને ટક્કર આપવા સામે ઉતાર્યા છે.

2014 ભાજપ તથા પેટાચૂંટણીમાં સપાની જીત થઈ હતી. 2014માં આ સીટ પર યોગીને 539127 મત મળ્યા હતાં. તો બીજા નંબરે સપા ઉમેદવાર રહ્યા હતાં. ત્રીજા નંબરે બસપા ઉમેદવાર હતા.

ગોરખપુર લોકસભામાં સીટ પર કુલ મતદારોની સંખ્યા 1903988 છે જેમાં 1055209 પુરુષ મતદાતા તથા 848621 મહિલા મતદારો છે. આ સીટ પર નિષાદ મતદાતાઓનો ખાસ્સો પ્રભાવ છે. તો વળી યાદવ અને દલિત મતદારોની પણ સારી એવી સંખ્યા છે.સપા બસપા ગઠબંધનને કારણે ફરી એક વાર આ સીટ પર ભાજપ માટે અઘરુ સાબિત થતું દેખાઈ રહ્યું છે.

આપને જણાવી દઈએ કે, ગોરખપુર સીટ પર લોકસભા ચૂંટણી 2019માં સાતમા તબક્કામાં મતદાન થવાનું છે.