INX મીડિયા કૌભાંડમાં બે દિવસનો રાજકીય ડ્રામા
દિલ્હી હાઈકૉર્ટે મંગળવારે બપોરે પી. ચિદમ્બરમની આગોતરા જામીન અરજી નામંજૂર કરી હતી. ચિદમ્બરમે ન્યાયલય પાસે ત્રણ દિવસનો સમય માંગી ધરપકડ ન કરાય એવું કહ્યું હતું, પરંતુ કૉર્ટમાંથી રાહત પણ ન જ મળી.
હાઈકૉર્ટમાંથી રાહત ન મળતાં પી. ચિદમ્બરમ સુપ્રીમ કૉર્ટના દ્વારે પહોંચ્યા હતા. તેમણે કપિલ સિબ્બલ, અભિષેક મનુ સિંઘવી અને સલમાન ખુર્શીદ સાથે મુલાકાત કરી આગળની રણનીતિ પર વિચાર કર્યો. તેમના તરફથી કૉર્ટમાં તત્કાલીન સુનાવણીની માગ કરવામાં આવી, પરંતુ કૉર્ટે તે માટે પણ સ્પષ્ટ ના પાડી દીધી, ત્યારબાદ CBI અને EDએ તેમની ધરપકડની તૈયારીઓ શરૂ કરી લીધી હતી, પરંતુ ચિદમ્બરમ કાયદાકીય ગુંચવણોથી બચવા અને તેનો ઉકેલ મેળવવા માટે માટે પોલીસથી દૂર ભાગી રહ્યાં હતા.
મંગળવારે બપોર પછી તેમની શોધખોળને વેગ મળ્યો. CBIની ટીમ સાંજે ચિદમ્બરમના ઘરે પહોંચી, પરંતુ તેઓ ઘરે ન મળ્યાં. એટલું જ નહીં તેમણે પોતાનો ફોન પણ બંધ કરી દીધો હતો. બાદમાં 10 મિનિટ પછી CBIની ટીમ ત્યાંથી ચાલી ગઈ હતી.
CBIના ખાલી હાથે પરત ફર્યા બાદ સાંજે 7:30 વાગ્યે ઈડીની ટીમ પણ ત્યાં પહોંચી અને ચિદમ્બરમની ધરપકડનો પ્રયત્ન કર્યો, પરંતુ ધરપકડ ન જ થઈ શકી. રાત્રે તપાસ એજન્સીઓએ તેમના ઘરે નોટિસ લગાવી અને બે કલાકમાં હાજર થવા માટે કહ્યું, પરંતુ ચિદમ્બરમે આ નોટિસની અવગણના કરી. બુધવારે સવારે આ ઘટનામાં સુપ્રીમ કૉર્ટે નિર્ણય ન લીધો. આ સાથે જ આગોતરા જામીન પર સુનાવણી ન થઈ, જેથી કૉર્ટે જામીન માટે શુક્રવારનો દિવસ નક્કી કર્યો.
બુધવારે સાંજે અચાનક પી. ચિદમ્બરમ કોંગ્રેસ કાર્યાલયે પહોંચ્યા અને તેમણે પત્રકાર પરિષદ કરી. જેમાં તેઓએ કહ્યું કે, INX મીડિયા કેસમાં તેમના પર કોઈ આક્ષેપ નથી. ચિદમ્બરમે કહ્યું કે, છેલ્લા 24 કલાકમાં તેમના વિશે ઘણાં ભ્રમ ફેલાવવામાં આવ્યા છે. આ ઘટનામાં તેમની અને તેમના પરિવાર વિરૂદ્ઘ કોઈ ચાર્જશીટ નથી. લોકતંત્રનું મૂળ આઝાદી છે. ચિદમ્બરમે કહ્યું કે, જો તેમણે જીંદગી અને આઝાદી વચ્ચે કોઈ એક વસ્તુ પસંદ કરવાની હશે તો તે આઝાદી પસંદ કરશે.
બાદમાં ચિદમ્બરમ પોતાના ઘરે ચાલ્યા ગયા, જેની પાછળ-પાછળ CBIની ટીમ પણ પહોંચી. અહીં ધરપકડ પહેલા ઘણો ડ્રામા ચાલ્યો, ત્યારબાદ સીબીઆઈની ટીમે દિવાલ કૂદીને ચિદમ્બરમની ધરપકડ કરી, ત્યારબાદ સીબીઆઈ હેડક્વાર્ટ્સમાં તેમની પૂછપરછ થઈ, તો ચાલો જાણીએ શું છે સમગ્ર કેસ?
શું છે INX કૌભાંડ કે જેમાં ચિદમ્બરમ લપેટાઈ ગયા?
INX મીડિયા કેસમાં સીબીઆઈએ પૂર્વ કેન્દ્રીય નાણાંપ્રધાન પી. ચિદમ્બરમની ધરપકડ કરી લીધી છે. હાઈ વોલ્ટેજ ડ્રામા બાદ દિલ્હીમાં સીબીઆઈએ ચિદમ્બરમને જોરબાગ સ્થિત તેમના ઘરેથી ધરપકડ કરી છે. સીબીઆઈ તેમને આજે કૉર્ટમાં રજૂ કરશે. સાથો સાથ ચિદમ્બરમ પણ જામીન માટે અરજી કરશે.
ચિદમ્બરમ પર INX મીડિયા કેસમાં વિદેશી ઈન્વેસ્ટમેન્ટ પ્રોમેશન બૉર્ડ પાસેથી ગેરકાયદેસર રીતે મંજૂરી અપાવવા અને લાંચ લેવાનો આક્ષેપ છે. આ કેસમાં અત્યાર સુધી ચિદમ્બરમને 20થી વધુ વાર ધરપકડથી રાહત મળી ગઈ હતી, પરંતુ આ વખતે તેમને કૉર્ટમાંથી રાહત ન મળાતા ધરપકડ કરવામાં આવી છે.
આમ તો આ ઘટના 2007ની છે, જ્યારે ચિદમ્બરમ યૂપીએ-2 સરકારમાં નાણાંપ્રધાન હતા. આ ઘટનામાં ચિદમ્બરમના પૂત્ર કાર્તિ ચિદમ્બરમની ધરપકડ થઈ ગઈ છે, પરંતુ તે હાલ જામીન પર બહાર છે. કાર્તિ ચિદમ્બરમને આ INX મીડિયાને 2007માં એફઆઈપીબીમાંથી મંજૂરી અપાવી ખોટી રીતે લાંચ લેવાના આક્ષેપ હેઠળ 28 ફેબ્રુઆરી, 2018ના રોજ ધરપકડ કરવામાં આવી હતી.
સીબીઆઈ અને ઈડીના અહેવાલ મુજબ, ચિદમ્બરમ નાણા પ્રધાન હતા ત્યારે તેમણે લાંચ લઈને INX મીડિયા જૂથને 2007માં વિદેશમાંથી રૂ. 305 કરોડ લેવા માટે ફોરેન ઈન્વેસ્ટમેન્ટ પ્રમોશન બોર્ડની મંજૂરી આપી હતી. જેના બદલે જે તે કંપનીઓને ફાયદો થયો હતો, એ જે તે કંપની પ્રત્યક્ષ કે પરોક્ષ રીતે પી. ચિદમ્બરમના પુત્ર કાર્તિ ચલાવતા હતા.
INX મીડિયાને એફઆઈપીબીની મંજૂરી કાર્તિની દખલ પછી અપાઈ હતી. સીબીઆઈએ 15 મે, 2017ના રોજ એફઆઈઆર નોંધી હતી. 2018માં ઈડીએ પણ મની લોન્ડરિંગ કેસ દાખલ કર્યો હતો. મહત્વનું છે કે, 3500 કરોડની એરસેલ મેક્સિસ ડીલને લઈને પણ ચિદમ્બરમ તપાસના દાયરામાં છે. યુપીએ-1માં તેઓ નાણા પ્રધાન હતા ત્યારે આ બંને ડિલને મંજૂરી મળી હતી.
ચિદમ્બરમ પર INX મીડિયાને એફઆઈપીબી મંજૂરી આપવામાં અનિયમિતતાનો આક્ષેપ છે. આ INX મીડિયા કેસમાં પીટર-ઈન્દ્રાણી મુખર્જી અને ચિદમ્બરમ એક મુલાકાત પણ ચર્ચામાં છે.
