જયપુર: રાજધાની જયપુરમાં દારૂનું વેચાણ શરૂ થતાં જ તેની અસર પણ જોવા મળી છે. દારૂના નશામાં રેસિડેન્ટ ડૉક્ટરનો હાઇ વોલ્ટેજ ડ્રામા જોવા મળ્યો હતો. જયપુરિયા હોસ્પિટલમાં પાણીની ટાંકી પર ચઢીને આ રેસિડેન્ટ ડૉક્ટરે હંગામો મચાવ્યો હતો.
આ ડોક્ટરનું નામ રવિન્દ્ર સિંહ છે, જે જયપુરિયા હૉસ્પિટલમાં ફરજ બજાવતા હતા. જયપુરિયા હોસ્પિટલમાં આવેલી ચોકીના કોન્સ્ટેબલ મુકેશ મીનાએ રેસિડેન્ટ તબીબને પાણીની ટાંકી પર દારૂની બોટલ સાથે બેઠો જોયો હતો.
આ મામલે કોન્સ્ટેબલ મુકેશ મીનાએ ઉચ્ચ પોલીસ અધિકારીઓને જાણ કરી હતી, માહિતી મળતા જ અનેક પોલીસ અધિકારીઓ અને સિવિલ ડિફેન્સની ટીમ ઘટના સ્થળે પહોંચી ગઈ હતી. પોલીસ અને સિવિલ ડિફેન્સની ટીમોએ ડૉક્ટરને નીચે આવવાની અપીલ કરી હતી, પરંતુ ડૉક્ટર ટાંકી પરથી નીચે ન ઉતર્યા.
લાંબા સમય પછી પોલીસ અનેસિવિલ ડિફેન્સની ટીમોએ પાણીની ટાંકી પરથી રેસિડેન્ટ તબીબને નીચે ઉતાર્યો હતો. ડોક્ટરને ટાંકી પરથી ઉતાર્યા બાદ તેને બજાજ નગર પોલીસ સ્ટેશન લઇ જવામાં આવ્યો હતો.
