અમદાવાદના નિકોલ વિસ્તારમાં રહેતા ચિરાગ પટેલ ખાનગી ચેનલમાં કોપી એડિટર તરીકેની કામગીરી સંભાળતા હતા. ગુરુવાર 15 માર્ચના રોજ રજા હોવાથી ઘરે હતા. ત્યારબાદ પોતાના ભાઈ સાથે વાત કરી હતી. પરંતુ ગુરૂવાર રાત્રે ઘરે નહીં આવતા તેમના પરિવારજનોએ શોધખોળ હાથ ધરી હતી. પરિવારજનો સ્થાનિક પોલીસ સ્ટેશનમાં ફરિયાદ કરવા માટે પણ ગયા હતા. પરંતુ પોલીસે ફરિયાદ લીધી ન હતી. ત્યારબાદ કઠવાડા પાસેની એક અવાવરુ જગ્યાએથી ચિરાગ પટેલનો અર્ધ બળેલી હાલતમાં મૃતદેહ મળી આવ્યો હતો. મૃતદેહ પાસે પડેલા પર્સમાંથી ખાનગી ચેનલનું આઈ કાર્ડ મળી આવતા તેની ઓળખ થઈ હતી. આ બનાવને પાંચ દિવસ થવા છતાં પોલીસ હજુ સુધી આરોપીઓને પકડી શકી નથી. પરિણામે ચિરાગ પટેલના પરિવારજનો ગૃહપ્રધાન પ્રદીપસિંહ જાડેજાને પાસે રજૂઆત માટે પહોચ્યા હતા.
મૃતક ચિરાગ પટેલના કાકા રમણભાઈ પટેલ અને તેના મોટાભાઈ જૈમીન પટેલે કહ્યું કે, ચિરાગ પટેલની હત્યાને આજે પાંચ દિવસ થયા છે. લોકલ પોલીસ હજુ સુધી કશું કરી શકી નથી. ત્યારે આ મામલાની ઝડપી તપાસ થાય અને આરોપીઓને ઝડપથી પકડી પાડવામાં આવે તે માટે અમે રજૂઆત કરવા આવ્યા હતા. પરંતુ ગૃહપ્રધાન મળ્યા નથી. ત્યારે તેમના અંગત સચિવ મનોજભાઈ પટેલને રજૂઆત કરી હતી. અમારી માગ છે કે, અમારા દીકરાની મોતની તપાસ ક્રાઈમ બ્રાન્ચ પાસે કરાવવામાં આવે. ચિરાગની કોઈ જગ્યાએ દુશ્મની ન હતી. ત્યારે આ પ્રકારનો બનાવથી અમે પોતે અચંબિત થઈ ગયા છીએ.
આ બાબતે મુખ્યપ્રધાન દ્વારા પણ આદેશ કરવામાં આવ્યો છે કે, ચિરાગ પટેલના મોતની તપાસ ઝડપથી કરવામાં આવે. મુખ્યપ્રધાન દ્વારા તપાસના આદેશ આપવામા આવ્યા છે. પરંતુ મંત્રી નિવાસમાં બેઠેલા ગૃહપ્રધાન એક પત્રકારની મોતની ગંભીરતા સમજતા નથી તેવું જોવા મળી રહ્યું છે.
