મીનઃ આજે આપ કુટુંબ અને સામાજિક બાબતોમાં વધારે પ્રવૃત્ત રહેશો. મિત્રોથી મુલાકાત અને લાભ મળે તો મિત્રો પાછળ નાણા ખર્ચવા પણ પડશે. ઘરમાં કોઇ સુંદર આયોજન થાય. નોકરી, વ્યવસાય, કૌટુંબિક આર્થિક એમ દરેક ક્ષેત્રમાં આજે લાભ થવાનો દિવસ છે. સ્ત્રી મિત્રોની મુલાકાત થાય. જીવનસાથીની શોધમાં હોય તેવા યુવક- યુવતીઓને મનપસંદ પાત્ર મળશે. આજના દિવસે તમે તમારી બહેનને મનગમતી ગિફ્ટ આપો. આમ કરવાથી આપનું જીવન પણ ખુશીઓથી છલકાઇ જશે. બહેન પાસે રાખડી બંધાવ્યા પછી આપની આર્થિક સ્થિતિ વધુ મજબૂત થશે અને આપને આવક વધારવા માટે કોઇ નવો સ્રોત મળી શકે છે. આપ નારંગી અને પીળા રંગની રાખડી બંધાવશો તો સૌથી ઉત્તમ રહેશે. ઉપાય- શિવલિંગનો અભિષેક કરો.
મેષઃ ઘર પરિવાર અને સંતાનોની બાબતમાં આજે આપને આનંદ અને સંતોષની લાગણીનો અનુભવ થશે. આજે આપ સગાં સંબંધીઓ અને મિત્રોથી ઘેરાયેલા રહેશો. વેપાર ધંધા અંગે કમ્યુનિકેશન થાય અને એમાં લાભ થાય. વ્યવસાય ક્ષેત્રે આપને ધન, માન અને પ્રતિષ્ઠાની પ્રાપ્તિ થશે. નોકરીમાં બઢતી મળે, આગ, પાણી અને વાહન અકસ્માતથી સંભાળવાની ચેતવણી આપવામાં આવે છે. કાર્યબોજથી થાક અનુભવાય. આજે આપ પરિવાર સાથે દિવસ પસાર કરી શકશો. કોઇપણ પ્રકારની ચિંતા આજે આપે છોડવી જોઇએ. આપ લાલ અથવા સફેદ રંગનું રક્ષાસૂત્ર બંધાવશો તો ઉત્તમ ફળ મળશે. તેનાથી આપની બહેન સાથે સંબંધોમાં ઘનિષ્ઠતા વધશે. ઉપાય- આજનો દિવસ શુભ બનાવવા માટે બજરંગબાણનો પાઠ કરવો.
વૃષભઃ વિદેશ વસતા સ્નેહી કે મિત્રના સમાચાર આપને આનંદવિભોર કરી દેશે. અગર આપ વિદેશ જવાની પેરવીમાં હશો તો અત્યારે કોઇપણ કારણથી વિલંબનો સામનો કરવો પડે. કોઇ ધાર્મિક સ્થળની મુલાકાત આપને આનંદ પમાડશે. ઓફિસ કે વ્યવસાયના સ્થળે કાર્યનું ભારણ વધારે રહે. વેપારધંધામાં આર્થિક લાભ થવાની શક્યતા છે. જો આપની બહેન દૂરના સ્થળે રહેતી હોય તો, આજે આપ તેમની સાથે ફોન પર ઘણી વાતો કરો. તેમની સાથે સારો સમય વિતાવવાનો પ્રયાસ કરો. આપ તેમને મળવા માટે ટ્રાવેલિંગ પણ કરી શકો છો. આજના દિવસે આસમાની અને સફેદ રંગની રાખડી બંધાવવાથી આપની વચ્ચેનો અતૂટ પ્રેમ વધુ મજબૂત થશે. ઉપાય- આજે દુર્ગામાતાની પૂજા ફળદાયક રહેશે.
મિથુનઃ આજના દિવસે દરેક રીતે ચેતીને ચાલવાની સલાહ આપવામાં આવે છે. આજે કોઇપણ નવા કાર્યની શરૂઆત ટાળવાની સલાહ છે. આપના મનમાં ક્રોધની લાગણી હોય તો દૂર કરીને શાંતિથી કામ લેવું. બીમાર વ્યક્તિએ નવી દવાની શરૂઆત કે ઓપરેશન આજે ટાળવાની સલાહ છે. ખર્ચને પહોંચી વળવા માટે અગાઉથી તૈયારી રાખવી. ઘરમાં કે ઓફિસમાં વાણી પર સંયમ રાખવાથી ઝગડો કે વિવાદ ટાળી શકાશે. ઇશ્વર આરાધનાથી શાંતિ મળે. આજે આપની બહેન માટે કોઇ સ્પેશિયલ ગિફ્ટ લઇને જાઓ. આ ગિફ્ટ લીલા રંગની હોય તો ઘણું સારું રહેશે. આપ પરિવારમાં આપની બહેન સાથે ખૂબ જ મસ્તી કરી શકો છો. આજે ગુલાબી અથવા લીલા રંગની રાખડી બંધાવવાનું આપના માટે અતિ ઉત્તમ રહેશે. આજે આપની બહેનને આર્થિક લાભ થશે. ઉપાય- ગણેશજીની આરાધના કરવાથી સારું ફળ મળશે.
કર્કઃ વૈભવી મોજશોખ અને મનોરંજનની પ્રવૃત્તિઓથી આજે આપ ખૂબ પ્રસન્ન રહેશો. વિજાતીય આકર્ષણ વધારે રહે અને વિજાતીય વ્યક્તિઓ સાથેની મુલાકાત મનને રોમાંચિત કરશે. મોજશોખના સાધનો, નવાં વસ્ત્રો, આભૂષણો, વાહન વગેરેની ખરીદી થાય. ઉત્તમ દાંપત્યસુખ મળે. વ્યવસાય ક્ષેત્રે આપને લાભ થાય. આરોગ્ય સારું રહેશે. માન પ્રતિષ્ઠામાં વધારો થાય. આજે આપે ઘણો સમય બહાર રહેવું પડે તેવી શક્યતા છે. બિઝનેસ સંબંધિત ચિંતા આજે છોડી દેવી. આજનો દિવસ બહેન સાથે પસાર કરવાનો છે. તેમને સાથે લઇ જઇને તેમની મનપસંદ વસ્તુ ખરીદો. આપનો સંબંધ વધુ મજબૂત બને તે માટે આપ બહેન સાથે બાળપણની યાદોમાં ખોવાઇ શકો છો. આપના માટે પીળા રંગ અને લાલ રંગની રાખડી ઉત્તમ રહેશે. ઉપાય- આપના પરિવારની ખુશી માટે સાત વખત હનુમાન ચાલીસાનો પાઠ કરો.
સિંહઃ આપનો આજનો દિવસ મધ્યમ ફળ આપનાર હશે. ઘરમાં પરિવારના સભ્યો સાથે આજે સંભાળીને વર્તવું. જેથી સંઘર્ષ ટાળી શકાય. રોજિંદા કામોમાં પણ કંઇક નડતર આવ્યા કરે જેના કારણે કામો વિલંબથી થાય. નોકરીમાં ઉચ્ચ અધિકારીઓ સાથે વાદવિવાદમાં પડવું નહીં. આજે વધુ પરિશ્રમ કર્યા બાદ પણ ફળ ધાર્યા મુજબ ન મળો તો પણ મન પર ના લેવાની સલાહ છે. બીજા લોકો પર વહેમ અને શંકાઓમાં પડવું નહીં. શત્રુઓથી સાવચેત રહેવું. માતૃપક્ષ સંબંધિત બાબતોમાં વધુ સમય આપવો પડશે. આજે આપના ખર્ચમાં થોડી વૃદ્ધિ થશે. જો આપની બહેન ક્યાંય દૂરના સ્થળે રહેતી હોય તો, આપ ફોન અથવા સોશિયલ મીડિયા દ્વારા તેમની સાથે વાતચીત કરો. તેનાથી તમારો માનસિક તણાવ પણ જતો રહેશે અને તમારા સંબંધોમાં ઘનિષ્ઠતા વધશે. આપના માટે નારંગી અને લાલ રંગની રાખડી બંધાવવાનું ખૂબ ઉત્તમ ફળદાયી રહેશે. ઉપાય- ભગવાન સૂર્યનારાયણને અર્ઘ્ય આપો.
કન્યાઃ આજના દિવસે આપ થોડી માનસિક ગડમથલ અનુભવો તેવી સંભાવના હોવાથી કામમાં એકચિત્ત થવા માટે વધુ પ્રયાસ કરવા પડે. આપને સ્વાસ્થ્ય અને સંતાનોની બાબતોમાં તમારે વધુ સમય ફાળવવો પડશે. આપને પેટની ફરિયાદ પણ રહ્યા કરે. વિદ્યાર્થીઓને ઈચ્છિત સફળતા માટે વધુ મહેનત કરવાની સલાહ છે. અચાનક ખર્ચ થઇ શકે. શેર સટ્ટાથી દૂર રહેવાની સલાહ છે. પ્રિયજનને મળવાનું થાય તેવી પણ શક્યતા છે. આજે આપ ભાઇ - બહેન વચ્ચે ખૂબ પ્રેમની લાગણી રહેશે અને કોઇક સિક્રેટ વાતો પણ એકબીજા સાથે શેર કરશો. તમે આજે તમારી બહેન પાસેથી કોઇ ખાસ કામ માટે મદદ માંગી શકો છો. તમારા માટે વાદળી અને આછા લીલા રંગની રાખડી બંધાવવાનું ભાગ્યશાળી રહેશે. ઉપાય- દુર્ગા ચાલીસાનો પાઠ કરો.
તુલાઃ આપના માટે આ શુભ સમય પૂરવાર થશે. સંવેદનશીલતાથી આપનું મન આર્દ્ર બને. શરીરમાં સ્ફૂર્તિ અને તાજગી ઓછી રહે. માનસિક બેચેની થોડી પરેશાનીમાં વધારો કરી શકે છે. ઘરમાં કલેશ ટાળવા માટે સૌહાર્દ જાળવવા પર વધુ ભાર મુકવો. ધન-કીર્તિને સંભાળવાની સલાહ છે. માતાના આરોગ્ય અને સુખાકારી માટે તમારે તેમની સેવા વધારવી પડશે. આપ્તજનો સાથે મનદુ:ખના બનાવ ટાળવા. સ્ત્રી તેમજ પાણીથી સંભાળીને ચાલવું. આપનો આજનો મોટાભાગનો સમય પરિવારની સાથે જ પસાર થશે. ભાઇ-બહેન અને માતા-પિતા સાથે આજે આપ મન ભરીને વાતો કરશો. બધા જ પ્રકારના તણાવ દૂર કરીને પ્રેમપૂર્ણ માહોલમાં આપની બહેન પાસે રાખડી બંધાવી શકશો. આપના માટે ગુલાબી અથવા સફેદ રંગની રાખડી ઉત્તમ રહેશે. ઉપાય- ભગવાન શંકરને બિલ્વપત્ર અર્પણ કરો.
વૃશ્ચિકઃ આપ આજનો દિવસ ખુશખુશાલ રીતે પસાર કરશો. નવા કાર્યની શરૂઆત કરશો. ઘરમાં ભાઇબહેનો સાથે સુમેળ રહેશે. સ્વજનો અને મિત્રો સાથે મિલન મુલાકાત થાય. આજે આપના કાર્યો સફળ થશે. ભાગ્યમાં લાભદાયી પરિવર્તન આવશે. દુશ્મનો અને હરીફો તેમની ચાલમાં નાકામિયાબ રહે. આપની લોકપ્રિયતામાં વધારો થાય. આજે બહેન પાસે રાખડી બંધાવવા માટે તમારે મુસાફરી પણ કરવી પડે તેવી શક્યતા છે. આજે આપ બહેન પાસે લાલ અથવા નારંગી રંગની રાખડી બંધાવજો. તેનાથી આપનું ભાગ્ય વધુ મજબૂત થશે અને તમારા સંબંધોમાં પણ ઘનિષ્ઠતા આવશે. આપ પરિવાર સાથે ખૂબ સારો સમય વિતાવી શકશો. ઉપાય- ભગવાન શિવજીને ગોળનો પ્રસાદ અર્પણ કરો.
ધનઃ આપનો દિવસ મિશ્રફળ આપનારો બની રહેશે. કુટુંબીજનો સાથે મતભેદ કે મનદુઃખ ટાળવા માટે તેમની લાગણી સમજવાનો અને જરૂરિયાતો સંતોષવાનો પ્રયાસ કરવો. આજે આપનું મનોબળ દૃઢ ન હોવાને કારણે નિર્ણય લેવામાં તકલીફ થશે માટે મહત્વના નિર્ણય લેવામાં બીજાની મદદ લેવી. બિનજરૂરી ખર્ચ પર કાબુ રાખવાની સલાહ છે. પારિવારિક અને આર્થિક ચિંતાઓને પાછળ છોડીને તમારી બહેન સાથે તમે પોતાના દિલની તમામ વાતો શેર કરી શકો છો. શુભ મુહૂર્તમાં રાખડી બંધાવવી. આનાથી આપની અને આપની બહેનની આર્થિક સ્થિતિ વધુ મજબૂત થશે. આપ પીળા, ક્રીમ અથવા ભૂરા રંગની રાખડી બંધાવશો તો ઉત્તમ રહેશે. ઉપાય- લાલ અથવા ભૂરા રંગની ગાયની સેવા કરો.
મકરઃ આપની આજની સવાર ઇશ્વરના નામ સ્મરણમાં પસાર થાય. પાઠ પૂજા ધાર્મિક કાર્ય કરો. આજે નોકરી- વ્યવસાયમાં પણ આપના માટે અનુકૂળ પરિસ્થિતિ સર્જાશે. આપનું દરેક કાર્ય સરળતાથી પૂર્ણ થાય. માન- સન્માન મળે. ઓફિસમાં ઉપરી અધિકારીઓની કૃપાદૃષ્ટિ રહે. નોકરીમાં બઢતીના યોગ છે. મિત્રો- સ્નેહીઓ તરફથી ભેટસોગાદ મળવાથી આનંદ થાય. ગૃહસ્થજીવન આનંદપૂર્ણ રહે. આરોગ્ય સારું રહે. સામાન્ય પડવા વાગવાથી સંભાળવું. આજે આપ આપના ભાઇ-બહેન પ્રત્યે વધુ ભાવુક રહેશો. જુની ભૂલો બદલ માફી પણ માંગી શકો છો. આનાથી આપનો સંબંધ વધુ મજબૂત થશે. આપના માટે આછી વાદળી અથવા ગુલાબી રંગની રાખડી બંધાવવાનું સારું રહેશે. તે આપના માટે સૌભાગ્યનું પ્રતીક રહેશે. ઉપાય- શ્રી ગણેશજીના મંત્રોનો જાપ કરવો.
કુંભઃ આજે કોઇના જામીન ન થવાની તેમજ કોઇ સાથે પૈસાની લેવડદેવડ ન કરવાની સલાહ આપવામાં આવે છે. માનસિક એકાગ્રતા ઓછી રહે. ખર્ચનું પ્રમાણ વધારે રહે. સ્વાસ્થ્યની બાબતમાં ધ્યાન રાખવું. મૂડીરોકાણ ખોટી જગ્યાએ ન થાય તેનું ધ્યાન રાખવું. સ્વજનો આપની વાતમાં સંમત ન થાય તેવું બને. પારકી પંચાતમાં ધરમ કરતા ધાડ પડી જેવો ઘાટ ન સર્જાય તે જોવું. ગેરસમજ, અકસ્માતથી બચતા રહેવું. ક્રોધ કાબૂમાં રાખવો. આજે આપનું સ્વાસ્થ્ય થોડું નબળું પડી શકે છે, પરંતુ આપની બહેનને મળવાથી અને તેમની પાસે રાખડી બંધાવવાથી તમારું બધું જ ધ્યાન સંબંધો પર કેન્દ્રિત થશે. આનાથી આપને તણાવમાંથી રાહત મળશે અને પરેશાનીઓમાં બહાર નીકળવાનો માર્ગ દેખાશે. આપના માટે લીલા અથવા આસમાની રંગની રાખડી ઉત્તમ રહેશે અને તેનાથી સ્વાસ્થ્યમાં પણ સુધારો આવશે. ઉપાય- આજે માતા મહાલક્ષ્મીની પૂજા કરો.
