- વડાપ્રધાને 'ટીમ ઈન્ડિયા-રિસ્પોન્ડિંગ એડવર્સીટી વિથ અચીવમેન્ટ' નામનો લેખ લખ્યો
- અન્ય યોજનાઓની જેમ રસીકરણ અભિયાનમાં 'VIP સંસ્કૃતિ' નથી : વડાપ્રધાન
- રસીકરણ અભિયાન સ્વતંત્ર ભારતના ઇતિહાસમાં અભૂતપૂર્વ પ્રયાસ રહ્યો
નવી દિલ્હી : વડાપ્રધાન નરેન્દ્ર મોદીએ (PM Narendra Modi) શુક્રવારે ભારતના કોરોના રસીકરણ અભિયાનને (Corona Vaccine Doses ) 'ચિંતાથી આશ્વાસન' સુધીની સફર ગણાવી હતી, જેણે દેશને મજબૂત બનાવ્યો. તેમણે "અવિશ્વાસ અને ગભરાટ પેદા કરવાના વિવિધ પ્રયાસો" હોવા છતાં રસીઓ પરનો લોકોના વિશ્વાસને સફળતાનો શ્રેય આપ્યો છે.
રસીકરણ અભિયાનમાં 'VIP સંસ્કૃતિ' નથી
દેશમાં સંચાલિત કોરોના રસીઓના ડોઝની સંખ્યા અત્યાર સુધીમાં 100 કરોડનો આંકડો પાર કરી ગયાના એક દિવસ બાદ, વડાપ્રધાન મોદીએ એક લેખમાં જણાવ્યું હતું કે, દેશની ક્ષમતા પર ઘણી શંકા હોવા છતાં નવ મહિનામાં આ સિદ્ધિ હાંસલ કરવામાં આવી હતી. વડાપ્રધાને કહ્યું કે, તેમની સરકારે સુનિશ્ચિત કર્યું છે કે અન્ય યોજનાઓની જેમ રસીકરણ અભિયાનમાં 'VIP સંસ્કૃતિ' નથી એટલે કે VIP (અતિ મહત્વપૂર્ણ વ્યક્તિ) ને પ્રાધાન્ય આપવામાં આવતું નથી. વડાપ્રધાને ભારતીય વૈજ્ઞાનિકો અને ઉદ્યોગસાહસિકોને રસી બનાવીને દેશને 'આત્મનિર્ભર' બનાવવાનો શ્રેય આપ્યો છે. એમ પણ કહ્યું કે, વિવિધ જૂથો દ્વારા તેમને રસીકરણમાં પ્રાથમિકતા આપવા દબાણ પણ કરવામાં આવી રહ્યું છે.
વડાપ્રધાન મોદીએ લેખ દ્વારા કહી અનેક વાત
પુણે અને હૈદરાબાદ પ્લાન્ટમાં રસીના ઉત્પાદનથી લઈને દેશભરમાં તેમના વિતરણને સુનિશ્ચિત કરવા સુધીનો પડકાર કેટલો મોટો હતો તે દર્શાવતા મોદીએ કહ્યું કે, આ અભિયાન સ્વતંત્ર ભારતના ઇતિહાસમાં અભૂતપૂર્વ પ્રયાસ રહ્યો છે. મોદીએ 'ટીમ ઈન્ડિયા-રિસ્પોન્ડિંગ એડવર્સીટી વિથ અચીવમેન્ટ' નામના લેખમાં લખ્યું હતું કે 'જ્યારે દરેક વ્યક્તિ જવાબદારી લે ત્યારે કંઈ પણ અશક્ય નથી'. અમારા આરોગ્ય કર્મચારીઓએ લોકોને રસી આપવા માટે મુશ્કેલ ભૌગોલિક વિસ્તારોમાં પર્વતો અને નદીઓ ઓળંગીને પાર કર્યા છે. આપણા યુવાનો, સામાજિક કાર્યકરો, આરોગ્ય કર્મચારીઓ, સામાજિક અને ધર્મગુરૂઓ આ બધા એ હકીકતનો શ્રેય જાય છે કે વિકસિત દેશોની સરખામણીમાં ભારતમાં રસીકરણ અંગે બહુ ઓછો ખચકાટ હતો.
રસીઓના 100 કરોડ ડોઝ પહોંચાડવાની સફર અદભૂત
તેમણે કહ્યું કે, રસીકરણની શરૂઆત બાદ માત્ર નવ મહિનામાં જ કોરોના વિરોધી રસીઓના 100 કરોડ ડોઝ પહોંચાડવાની સફર અદભૂત રહી છે. મોદીએ ભારપૂર્વક જણાવ્યું હતું કે ,માનવતા 100 વર્ષ પછી આટલી મોટી વૈશ્વિક મહામારીનો સામનો કરી રહી છે અને 2020 માં ફાટી નીકળ્યા પહેલા કોઈને આ વાયરસ વિશે વધારે જાણકારી નહોતી. મોદીએ કહ્યું કે, ભારતનું રસીકરણ અભિયાન એ એક ઉદાહરણ છે કે જો નાગરિકો અને સરકાર સાથે મળીને 'લોકભાગીદારી'ની ભાવનામાં લક્ષ્ય માટે કામ કરે તો દેશ ક્યાં પહોંચી શકે છે.
આ પણ વાંચો:
