અમદાવાદ: મુસાફરોની સુવિધા અને મુસાફરીની માંગને પહોંચી વળવાના ઉદ્દેશ્ય સાથે આ વર્ષે પશ્ચિમ રેલ્વે દિવાળી/છઠ પૂજાના તહેવારોના સમય દરમિયાન 200 વિશેષ ટ્રેનો ચલાવી રહી છે. તેમાંથી 22 ટ્રેનો અમદાવાદ ડિવિઝન દ્વારા વિવિધ સ્થળો માટે ચલાવવામાં આવી રહી છે, વધારાની વિશેષ ટ્રેનોના સંચાલનની દેખરેખ વરિષ્ઠ અધિકારીઓ દ્વારા મંડળ અને હેડક્વાર્ટર સ્તરે કરવામાં આવી રહી છે. આ જ રીતે ટ્રેનોની વેઇટિંગ લિસ્ટનું પણ રીઅલ ટાઇમના આધારે દરરોજ નિરીક્ષણ કરવામાં આવે છે.
પશ્ચિમ રેલવે મુસાફરોને સુરક્ષિત રીતે તેમના ગંતવ્ય સ્થાન સુધી પહોંચાડવા માટે તમામ શક્ય પ્રયાસો કરી રહી છે અને આ દિશામાં જરૂરી વ્યવસ્થા કરવામાં આવી રહી છે. ભીડ પર નજર રાખવા અને નિયંત્રણ કરવા માટે, અમદાવાદ, સાબરમતી, ગાંધીધામ અને અસારવા જેવા ઉચ્ચ ટ્રાફિક સ્ટેશનો પર સ્ટાફની મહત્તમ તૈનાતી સુનિશ્ચિત કરવામાં આવી છે. આ સિવાય અમદાવાદ, અસારવા અને સાબરમતી સ્ટેશનો પર પ્લેટફોર્મ ટિકિટના વેચાણ પર 6 નવેમ્બર 2024 સુધી કામચલાઉ પ્રતિબંધ લાદવામાં આવ્યો છે.
તમને જણાવી દઈએ કે, આ પગલાનો હેતુ પ્લેટફોર્મ પર ભીડનું સંચાલન કરવા અને સ્ટેશન પરિસરમાં મુસાફરોની સરળ અવરજવર સુનિશ્ચિત કરવાનો છે. ક્રાઉડ મેનેજમેન્ટ હેઠળ અમદાવાદ મંડળ દ્વારા વોર રૂમની રચના કરવામાં આવી છે. જ્યાં વરિષ્ઠ અધિકારીઓ 24 કલાક મોનીટરીંગ કરી રહ્યા છે. ઉચ્ચ અધિકારીઓ પણ પ્લેટફોર્મ પર ભીડના સમયમાં ઉપલબ્ધ હોય છે. તબીબી કટોકટી માટે ડૉક્ટરની ટીમ અને એમ્બ્યુલન્સ જરૂરિયાતના હિસાબે સતર્ક કરવામાં આવી છે.
પશ્ચિમ રેલ્વેએ આ સ્ટેશનો પર ભીડ વ્યવસ્થાપનના યોગ્ય અમલીકરણ માટે અનેક સાવચેતીના પગલાં લીધા છે અને વિવિધ વિસ્તૃત વ્યવસ્થાઓ કરવામાં આવી છે. ભીડ વ્યવસ્થાપનના અસરકારક અમલીકરણ માટે,અમદાવાદ અને સાબરમતી સ્ટેશનો પર પેસેન્જર હોલ્ડિંગ એરિયા બનાવવામાં આવ્યા છે. મુસાફરોની આરામદાયક પ્રતીક્ષા માટે તેમાં પંખા લગાવવામાં આવ્યા છે. આ વિસ્તાર પ્લેટફોર્મ પર રાહ જોઈ રહેલા મુસાફરોની સંખ્યામાં ઘટાડો કરશે અને મુસાફરો માટે સલામત અને સરળ મુસાફરી સુનિશ્ચિત કરીને ટ્રેનોમાં મુસાફરોને સરળતાથી પ્રવેશવાની મંજૂરી આપશે. દિવાળી/છઠ પૂજા દરમિયાન અમદાવાદ અને સાબરમતી સ્ટેશનો પર વધારાની ભીડને ધ્યાનમાં રાખીને ત્રણેય શિફ્ટમાં વધારાના ટિકિટ કાઉન્ટર પણ ખોલવામાં આવ્યા છે.
દેશના ઉત્તરીય રાજ્યો તરફ જતી ટ્રેનોમાં, ખાસ કરીને સામાન્ય અને સ્લીપર કોચમાં આરપીએફ અને જીઆરપી જવાનોને તૈનાત કરવામાં આવ્યા છે. આ પગલાનો હેતુ તમામ મુસાફરો માટે સલામત અને અનુકૂળ વાતાવરણ બનાવવાનો છે. આ ઉપરાંત, આરપીએફ અને જીઆરપીની સાદા કપડાંમાં સીપીડીએસ (ક્રાઈમ પ્રિવેન્શન એન્ડ ઈન્વેસ્ટિગેશન ટીમ) ની ટીમો કોઈપણ શંકાસ્પદ પ્રવૃત્તિ પર નજર રાખવા અને ચોરી અટકાવવા સ્ટેશનો પર સક્રિયપણે પેટ્રોલિંગ કરી રહી છે. ભીડ પર સખ્ત નજર રાખવા માટે સ્ટેશનો પર ચોવીસ કલાક સીસીટીવી દેખરેખ સક્રિય કરવામાં આવી છે. સ્ટેશન પરિસરની સતત દેખરેખ રાખવા માટે સમર્પિત સ્ટાફની નિમણૂક કરવામાં આવી છે, અને જો કોઈ ચોક્કસ વિસ્તારમાં ભીડ વધે તો ફિલ્ડ યુનિટ્સને એલર્ટ કરવામાં આવશે.
વિશેષ ટ્રેનોને વ્યાપક પ્રસિદ્ધિ આપવા અને લોકોમાં માહિતીનો યોગ્ય પ્રસાર સુનિશ્ચિત કરવાના તમામ પ્રયાસો કરવામાં આવી રહ્યા છે. મુસાફરોને વધારાની ટ્રેન સેવાઓ વિશે માહિતગાર રાખવા માટે નિયમિત ટ્વીટ્સ, સોશિયલ મીડિયા પોસ્ટ્સ, અખબાર પ્રમોશન હાથ ધરવામાં આવે છે. આ ઉપરાંત ટિકિટ ચેકિંગ સ્ટાફ, આરપીએફ અને જીઆરપી સ્ટાફ પબ્લિક એનાઉન્સમેન્ટ સિસ્ટમ દ્વારા મુસાફરોને માર્ગદર્શન આપી રહ્યા છે.
આ પણ વાંચો:
