નવી દિલ્હી: દિલ્હી હાઈકોર્ટે જૂન મહિનામાં ઈન્દિરા ગાંધી ઈન્ટરનેશનલ એરપોર્ટના T-1 સહિત દેશના 3 એરપોર્ટની છત ધરાશાયી થવાના કેસમાં SIT તપાસની માંગ કરતી અરજીને ફગાવી દીધી છે. ચિફ જસ્ટિસ મનમોહનની અધ્યક્ષતાવાળી બેન્ચે કેન્દ્ર સરકારની દલીલો સાંભળ્યા બાદ અરજીનો નિકાલ કરવાનો આદેશ આપ્યો હતો.
આ અરજી ભારતીય નાગરિક સુરક્ષા પરિષદ વતી તેના અધ્યક્ષ યતિન સ્વામી દ્વારા દાખલ કરવામાં આવી હતી. અરજીમાં દેશના 3 અલગ-અલગ એરપોર્ટ પર 3 દિવસમાં 3 અકસ્માતો થયાનો ઉલ્લેખ છે. જે એરપોર્ટ જેવા ક્ષેત્ર માટે ગંભીર ચિંતાનો વિષય છે. દેશના એરપોર્ટની છત તૂટી જવાથી એરપોર્ટની સુરક્ષા અને સુવિધાઓને લઈને ગંભીર ચિંતાઓ ઉભી થઈ છે. અરજીમાં કહેવામાં આવ્યું છે કે, એરપોર્ટ બિલ્ડિંગના બાંધકામની ગુણવત્તા અને દિલ્હી સહિત તમામ એરપોર્ટ ટર્મિનલમાં અધિકારીઓ દ્વારા આપવામાં આવેલી મંજૂરીઓની તપાસ એન્જિનિયરોના વિશેષ જૂથ અથવા સીબીઆઈને સોંપવામાં આવે.
કેન્દ્ર સરકારના વકીલે કહ્યું કે, દિલ્હી એરપોર્ટ પર બનેલી ઘટનાના સંબંધમાં પોલીસે FIR નોંધી છે. ભારતીય દંડ સંહિતાની કલમ 337 અને 304A હેઠળ FIR નોંધવામાં આવી છે અને તેની તપાસ ચાલી રહી છે. કેન્દ્ર સરકારે કહ્યું કે કેન્દ્રીય નાગરિક ઉડ્ડયન મંત્રાલયે IITના એન્જિનિયરોની એક ઉચ્ચ સ્તરીય સમિતિની રચના કરી છે જે આ અંગે તપાસ કરીને રિપોર્ટ આપશે. તેમજ દેશના તમામ એરપોર્ટ ઓપરેટરોને IIT દ્વારા બિલ્ડિંગ સિક્યુરિટી ઓડિટ કરાવવાનો નિર્દેશ આપવામાં આવ્યો છે. તમામ એરપોર્ટને દર વર્ષે ચોમાસાની શરૂઆત પહેલા બિલ્ડીંગની ડિઝાઇન અને છતની રચના સહિત તમામ ટેકનિકલ પાસાઓની ચકાસણી કરવા પણ સૂચના આપવામાં આવી છે.
