રાજકોટ: આજી ડેમ પાસે છેલ્લા કેટલાક સમયથી રવિવારી બજાર ભરાય છે. આ બજાર જે ડેમ વિસ્તારમાં આવે છે તેમાં થોડો સમય પહેલા ડેમના અધિકારીઓ દ્વારા અહીં બજાર બંધ કરવા માટે નોટિસ આપવામાં આવી હતી. ત્યારે આ જગ્યા ખાલી નહીં કરવામાં આવે તો લેન્ડ ગ્રેબિગ હેઠળ પણ કાર્યવાહી કરવામાં આવશે. તેવી ચેતવણી આપવામાં આવી છે.
કાર્યકારી પ્રદેશ પ્રમુખની અધ્યક્ષતામાં રેલી: આ અંગે કોંગ્રેસના કાર્યકારી પ્રદેશ પ્રમુખ જીગ્નેશ મેવાણીની અધ્યક્ષતામાં બજારમાં વેપાર કરતા વેપારીઓ અને કોંગ્રેસની આગેવાનીમાં ત્રિકોણબાગ ખાતેથી રેલી યોજવામાં આવી હતી અને આ રેલી કોર્પોરેશન ખાતે પહોંચી હતી. ત્યાં મ્યુનિસિપલ કમિશનર દેવાંગ દેસાઈને આ બાબતે રજૂઆત કરવામાં આવી હતી.
મ્યુનિસિપલ કમિશ્નરને કરાઇ રજૂઆત: મ્યુનિસિપલ કમિશ્નરને રજૂઆત કરવામાં આવી હતી કે, બજાર ન ખાલી કરાવી અથવા અન્ય વૈકલ્પિક વ્યવસ્થા બજાર માટે આપવી તેવી રજૂઆત કરવામાં આવી હતી જે બાબતે મ્યુનિસિપલ કમિશનરે જણાવ્યું હતું કે, આ અંગે સિંચાઈ વિભાગ સાથે વિચાર વિમર્શ કરવામાં આવશે અને યોગ્ય નિરાકરણ લાવવા માટેના પ્રયાસો કરવામાં આવશે.
