બનાસકાંઠા: બનાસકાઠાના ભાભરમાંથી એક ચોંકાવનારી ઘટના સામે આવી છે. ભાભરમાં જૈન સમાજના સાધ્વી સાથે નરાધમોએ છેડતીનો પ્રયાસ કર્યો હતો. તમામ સમાજને શર્મસાર કરતો કિસ્સો સામે આવ્યો છે. મળતા અહેવાલ પ્રમાણે બપોરે જૈન સાધ્વી કામ અર્થે નિકળ્યા હતા. ત્યારે અચાનક બે શખ્સો આવી પહોંચ્યા અને છેડતી કરી હતી. જયારે સાધ્વીએ બૂમાબૂમ કરતા નરાધમો ભાગી છૂટ્યા હતા. જેને પગલે જૈન સમાજના અગ્રણીઓ પોલીસ મથકે દોડી આવ્યા હતા અને પોલીસ મથકે રજૂઆત કરતા પોલીસ દ્વારા શંકાસ્પદોની પૂછપરછ હાથ ધરી છે. બનાવને પગલે સાંસદ ગેનીબેન ઠાકોરે પણ આ ઘટનાને વખોડી છે. આરોપીઓને તાત્કાલિક ધોરણે ઝડપીને કડકમાં કડક કાર્યવાહી કરવા માંગ કરી છે. સાધ્વીએ બૂમાબૂમ કરતા નરાધમો ભાગી છૂટ્યા હતા.
છેડતી કરનાર શખ્સોની શોધખોળ હાથ ધરી: ઘટનાને પગલે સમગ્ર જૈન સમાજમાં ભારે રોષ જોવા મળ્યો હતો. ઉલ્લેખનીય છે કે ફક્ત જૈન સમાજ નહીં પરંતુ અન્ય સમાજના લોકો પણ સખ્ત વિરોધ કરી રહ્યા છે. તો બીજી તરફ આ સમગ્ર મામલો પોલીસ સ્ટેશન પહોંચ્યો હતો. ભાભર પોલીસે મામલાની ગંભીરતા જોઈને છેડતી કરનાર શખ્સોની શોધખોળ હાથ ધરી છે.
આરોપીઓને તાત્કાલિક પકડવા માંગ: બનાસકાઠાંના કોંગ્રેસના નેતા ગેનીબેન ઠાકોરે આરોપીઓને તાત્કાલિક પકડવા માંગ કરી છે, તો બીજી તરફ તેમણે એ પણ કહ્યું કે હવે ધર્મ પણ સુરક્ષિત નથી. તેમણે કહ્યું કે હું જૈન સમાજ સાથે છું. આરોપીઓને પોલીસ જલ્દી પકડીને જેલમાં નાખે તેવી માંગ કરી છે. ઘટનાને મામલે ભાભર પોલીસ દિયોદર એએસપી બનાસકાંઠા એલસીબી શહિતની ટીમો તપાસ હાથ ધરી છે. અને શંકાસ્પદ શખ્સોની પૂછ પરછ હાથ ધરવામાં આવી છે.
