વાલીઓ માટે માઠા સમાચાર : સ્કૂલ વાન-રીક્ષાના ભાડામાં વધારો ઝીંકાયો - School van rickshaw fares

સ્કૂલ વર્ધી એસોસિએશન દ્વારા સ્કૂલ વાન અને સ્કૂલ રીક્ષાના ભાડામાં વધારાનો નિર્ણય કરવામાં આવ્યો છે. છેલ્લે 2021માં ભાડામાં વધારો કરવામાં આવ્યો હતો. ત્યારે હવે ફરી ત્રણ વર્ષે ભાવ વધારો કરવામાં આવ્યો છે.

અમદાવાદ : 13 જૂનથી નવું શૈક્ષણિક સત્ર શરૂ થવા જઇ રહ્યું છે. ત્યારે વર્ધી એસોસિએશન દ્વારા આ વર્ષથી સ્કૂલ વાન અને રીક્ષાના ભાડામાં વધારો કરવાનો નિર્ણય કરવામાં આવ્યો છે. RTO માં પાસીંગ ખર્ચનો બોજો, ઇન્સ્યોરન્સ અને પરમીટ સહિતના ખર્ચને લઇને ભાડામાં વધારો કરવામાં આવ્યો છે.

શાળા જવાનું ભાડું વધશે : સ્કૂલ વાન અને રીક્ષાચાલકો સામે RTO દ્વારા લાલ આંખ કરી કડકપણે નિયમોનું પાલન કરવા જાહેરાત કરવામાં આવી છે. જેથી અમદાવાદ સ્કૂલ વર્ધી એસોસિએશનની બેઠક મળી હતી. આ બેઠકમાં ચર્ચા થઈ તે અનુસાર RTO નિયમોને લઈને 50 હજાર રૂપિયા જેટલો ખર્ચ થઈ રહ્યો છે. જેથી સ્કૂલ વર્ધી એસોસિએશન દ્વારા સ્કૂલ વાન અને રીક્ષાના ભાડામાં વધારો કરવામાં આવ્યો છે.

• એક કિમી દીઠ રિક્ષામાં 100 રૂપિયા અને વાનમાં 200 રૂપિયાનો વધારો કરવામાં આવ્યો

	સ્કૂલ રીક્ષા	સ્કૂલ વાન
1 કિમી	રુ. 750	રુ. 1200
2 કિમી	રુ. 850	રુ. 1400
3 કિમી	રુ. 950	રુ. 1600
4 કિમી	રુ. 1050	રુ. 1800
5 કિમી	રુ. 1150	રુ. 2000