લોકસભા ચૂંટણી 2024ના સૌથી યુવા વિજેતા: હાલમાં તમારી ઉંમર કેટલી છે? તમે 25 વર્ષની ઉંમરે શું કરતા હતા અથવા 25 વર્ષની ઉંમરે તમે તમારી જાતને ક્યાં જુઓ છો? આ સવાલ એટલા માટે છે કારણ કે દેશમાં લોકસભા ચૂંટણીના પરિણામો આવી ગયા છે. દેશની જનતાએ પોતાના પ્રતિનિધિઓને ચૂંટ્યા છે. શું તમે જાણો છો કે આ વખતે લોકસભા ચૂંટણી જીતનાર સૌથી યુવા ઉમેદવાર કોણ છે અને તે કઈ પાર્ટીનો છે? આવો તમને જણાવીએ. પરંતુ સૌથી પહેલા તમને એ જણાવી દઈએ કે દેશમાં લોકસભા કે વિધાનસભાની ચૂંટણી લડવા માટે લઘુત્તમ ઉંમર 25 વર્ષ છે. એટલા માટે અમે વારંવાર 25 વર્ષનો આગ્રહ કરી રહ્યા છીએ. ચાલો તમને એવા ઉમેદવારોનો પરિચય કરાવીએ જેમણે 25 વર્ષની વયે દેશની સૌથી મોટી ચૂંટણી જીતીને ખળબળાટ મચાવી દીધી છે.
1. પુષ્પેન્દ્ર સરોજ
ઉત્તર પ્રદેશની કૌશામ્બી લોકસભા સીટ પરથી 25 વર્ષીય પુષ્પેન્દ્ર સરોજ લોકસભામાં પહોંચનાર દેશના સૌથી યુવા ઉમેદવાર છે. તેમની જીત એટલા માટે પણ મોટી છે કારણ કે તેમણે ભાજપના વર્તમાન સાંસદ વિનોદ કુમાર સોનકરને એક લાખથી પણ વધુ મતોથી હરાવ્યા છે. પુષ્પેન્દ્ર સરોજ 5 વખત ધારાસભ્ય અને ઉત્તર પ્રદેશ સરકારમાં મંત્રી રહેલા ઈન્દ્રજીત સરોજના પુત્ર છે.
સમાજવાદી પાર્ટીના ઉમેદવાર પુષ્પેન્દ્ર સરોજને લોકસભા ચૂંટણીમાં કુલ 5,09,787 વોટ મળ્યા હતા, જ્યારે વિનોદ કુમાર સોનકરને 4,05,843 વોટ મળ્યા હતાં. પુષ્પેન્દ્ર આ ચૂંટણીમાં 1,03,944 મતોથી જીત્યા છે અને હવે તેઓ સંસદમાં કૌશામ્બી લોકસભા મતવિસ્તારનું પ્રતિનિધિત્વ કરશે.
2. પ્રિયા સરોજ
ઉત્તર પ્રદેશમાંથી વધુ એક 25 વર્ષીય ઉમેદવાર સંસદમાં પહોંચ્યા છે. સમાજવાદી પાર્ટીના ઉમેદવાર પ્રિયા સરોજે ઉત્તર પ્રદેશની મછલીશહર લોકસભા બેઠક પરથી 35,850 મતોથી ચૂંટણી જીતી છે. પ્રિયા સરોજ 3 વખતના લોકસભા સાંસદ તુફાની સરોજની પુત્રી છે. પ્રિયાએ ભાજપના વર્તમાન સાંસદ ભોલાનાથને હરાવીને સનસનાટી મચાવી દીધી છે. ભાજપના ઉમેદવાર અને વર્તમાન સાંસદ ભોલાનાથને 4,15,442 વોટ મળ્યા હતા જ્યારે પ્રિયાને 4,51,292 વોટ મળ્યા હતા.
3. શાંભવી ચૌધરી
બિહારની નીતીશ કુમાર સરકારમાં મંત્રી અશોક ચૌધરીની પુત્રી શાંભવી ચૌધરી 18મી લોકસભાના સૌથી યુવા સાંસદોમાં સામેલ થશે. 25 વર્ષની શાંભવી ચૌધરી બિહારની સમસ્તીપુર લોકસભા બેઠક પરથી લોક જનશક્તિ પાર્ટી (રામ વિલાસ) પાર્ટીની ઉમેદવાર હતી. તેમને 5,79,786 મત મળ્યા અને તેમણે કોંગ્રેસના ઉમેદવાર સન્ની હજારીને 1,87,251 મતોથી હરાવ્યા હતા. જ્યારે PM નરેન્દ્ર મોદી પણ જાહેર સભામાં પહોંચ્યા ત્યારે તેમણે રેલીમાં શાંભવીના વખાણ કર્યા અને કહ્યું કે તે NDAની સૌથી યુવા ઉમેદવાર છે. હવે 25 વર્ષની શાંભવી સંસદમાં તેના લોકસભા ક્ષેત્રના લોકોનું પ્રતિનિધિત્વ કરશે.
4. સંજના જાટવ
રાજસ્થાનની ભરતપુર લોકસભા સીટ પરથી કોંગ્રેસના ઉમેદવાર સંજના જાટવ પણ આ યાદીમાં સામેલ છે. હવે તે સંસદમાં પણ પોતાના લોકસભા મતવિસ્તારનું પ્રતિનિધિત્વ કરશે. તેમણે ભાજપના રામસ્વરૂપ કોલીને 51,983 મતોથી હરાવ્યા હતા. આ ચૂંટણીમાં સંજના જાટવને 5,79,890 વોટ મળ્યા હતા. જો કે સંજનાએ નવેમ્બર 2023માં રાજસ્થાન વિધાનસભાની ચૂંટણી પણ લડી હતી, પરંતુ તે ભાજપના ઉમેદવાર સામે માત્ર 409 મતોથી હારી ગઈ હતી. સંજના જાટવ પણ 25 વર્ષની છે.
