હૈદરાબાદ: આજે સમગ્ર દેશમાં નેશનલ એલિજિબિલિટી કમ એન્ટ્રન્સ ટેસ્ટ (NEET) PGની પરિક્ષા યોજાઈ હતી. જે નેશનલ બોર્ડ ઑફ એક્ઝામિનેશન્સ ઇન મેડિકલ સાયન્સ અથવા NBEMS દ્વારા લેવામાં આવી હતી. CBT(કોમ્પ્યુટર-આધારિત ટેસ્ટ) મોડમાં એક જ દિવસમાં બે શિફ્ટમાં પરીક્ષા લેવામાં આવી હતી. પરીક્ષાની પ્રથમ તબક્કાનો સમય સવારે 9 વાગ્યાથી બપોરે 12:30 વાગ્યા સુધીનો હતો, જ્યારે બીજા તબક્કાનો સમય બપોરના 3 વાગ્યાથી 6 વાગ્યા સુધીનો હતો.
મેડિકલ ક્ષેત્રમાં ઉચ્ચ શિક્ષણમાં પ્રવેશ મેળવવા માટે કોમ્યુટર આધારિત પરિક્ષા માટે દેશભરમાંથી 2.36 લાખથી પણ વધુ વિદ્યાર્થીઓએ પરિક્ષા આપી હતી. જેમાં ગુજરાતમાંથી 9000 જેટલા વિદ્યાર્થીઓએ નીટ પોસ્ટ ગ્રેજ્યુએશન પ્રવેશ માટેની પરિક્ષા આપી હતી. અગાઉ 23 જૂનના રોજ NEET PG પરિક્ષાનું આયોજન કરવામાં આવ્યું હતું.
ઉલ્લેખનીય છે કે, મેડિકલમાં પીજીના અભ્યાસમાટે દેશમાં 54,000 અને રાજ્યમાં 2500 જેટલી બેઠકો માટે વિદ્યાર્થીઓએ પરિક્ષા આપી હતી. દેશભરમાં 1000 કરતા પણ વધુ પરિક્ષા કેન્દ્રો પર NEET PGની પરિક્ષા યોજાઈ હતી. દરેક વિદ્યાર્થીનું સિક્યુરિટી ચેકિંગ કર્યા બાદ જ પરિક્ષા કેન્દ્રમાં પ્રવેશ આપવામાં આવતો હતો.
