નાગપુર: ભારતીય વિમાનો અને રેલવે સ્ટેશનોને બોમ્બથી ઉડાવી દેવાની ધમકી આપનાર આરોપી જગદીશ ઉઇકેને આખરે પોલીસે કસ્ટડીમાં લઈ લીધો છે. ગયા મહિને લગભગ 300 વિમાનોને બોમ્બથી ઉડાવી દેવાની ધમકી આપવામાં આવી હતી. નાગપુરના પોલીસ કમિશનર રવિન્દ્ર સિંઘલે માહિતી આપી હતી કે, આરોપી જગદીશ ઉઇકેને શુક્રવારે રેલવે સ્ટેશન પરથી અટકાયતમાં લેવામાં આવ્યો હતો.
તમને જણાવી દઈએ કે છેલ્લા કેટલાક દિવસોથી દેશના ઘણા મહત્વપૂર્ણ એરપોર્ટ પર બોમ્બની ધમકીના ઈમેલ સતત મળી રહ્યા છે. નિરીક્ષણ અને ચુસ્ત સુરક્ષા વ્યવસ્થાના કારણે ઘણા વિમાનોની ફ્લાઈટ્સ કેટલાંક કલાકો મોડી પડી હતી અને એરલાઈન્સને કરોડો રૂપિયાનું નુકસાન વેઠવું પડ્યું હતું. તમામ કેસમાં જગદીશ ઉઇકેનું નામ સામે આવ્યું હતું. નાગપુર પોલીસ વિભાગ આરોપીને પકડવા માટે છેલ્લા ઘણા દિવસોથી સર્ચ ઓપરેશન ચલાવી રહ્યું હતું. આખરે શુક્રવારે નાગપુર પોલીસને સફળતા મળી.
પ્રાપ્ત માહિતી અનુસાર, જગદીશ ઉઇકે ગોંદિયા જિલ્લાના મોરગાંવ તાલુકાના તાડગાંવનો રહેવાસી છે. જો કે, તે 2016 થી ગોંદિયા છોડી ગયો હતો. તેણે ગોંદિયામાં પોતાનું ઘર પણ વેચી દીધું હતું. જગદીશ ઉઇકે તેના માતા-પિતા સાથે પણ રહેતો ન હતો. પોલીસે જણાવ્યું કે, 35 વર્ષીય જગદીશ ઉઇકેએ આતંકવાદ પર એક પુસ્તક પણ લખ્યું છે. પુસ્તક પણ વિવાદાસ્પદ બન્યું હોવાથી તે પોલીસના નિશાના પર આવ્યો હતો.
તપાસ દરમિયાન પોલીસને એ પણ જાણવા મળ્યું કે, આરોપીએ નોકરી અપાવવાના બહાને ઘણા લોકોને છેતર્યા છે. તાજેતરમાં, રેલ્વે પ્રોટેક્શન ફોર્સ અને રેલ્વે સંબંધિત ઘણી ઓફિસો સહિત રેલ્વે મંત્રીને એક ઈ-મેલ મોકલવામાં આવ્યો હતો. જેમાં આતંકવાદી કોડને ડીકોડ કરવાનો દાવો કરીને કહેવામાં આવ્યું હતું કે આગામી પાંચ દિવસમાં દેશના વિવિધ રેલવે સ્ટેશનો અને રેલવે વિભાગના પરિસરમાં 30થી વધુ બ્લાસ્ટ કરવામાં આવશે. જ્યારે સુરક્ષા એજન્સીઓએ આ અંગે સઘન તપાસ હાથ ધરી હતી. ત્યારે ખબર પડી કે આ ઈ-મેલ પાછળ જગદીશ ઉઇકે નામનો યુવક હતો. રસપ્રદ વાત એ છે કે જગદીશ ઉઇકેની પોલીસે 2021માં ધમકીભર્યા ઈ-મેલના સંબંધમાં ધરપકડ કરી હતી.
ત્યારે તપાસ દરમિયાન તપાસ એજન્સીઓને જાણવા મળ્યું હતું કે જગદીશ ઉઇકે માનસિક રીતે અસ્થિર હતો. હાલ દિલ્હીના કનોટ પ્લેસમાં જગદીશ ઉઇકેનું છેલ્લું લોકેશન મળ્યું હતું. તેના આધારે પોલીસ તેને દિલ્હી, નાગપુર અને ગોંદિયામાં શોધી રહી હતી. હવે પોલીસ કમિશનર રવીંદ્ર સિંઘલે જાણકારી આપી છે કે જગદીશ ઉઇકેને પોલીસે દિવાળીના દિવસે શુક્રવારે નાગપુર રેલવે સ્ટેશનથી કસ્ટડીમાં લઈ લીધો છે.
આ પણ વાંચો:
