નવી દિલ્હીઃ દિલ્હીના મુખ્યમંત્રી અરવિંદ કેજરીવાલને દિલ્હી હાઈકોર્ટમાંથી મોટી રાહત મળી છે. દિલ્હી હાઈકોર્ટે તે અરજી ફગાવી દીધી છે જેમાં કેજરીવાલને દિલ્હીના સીએમ પદેથી હટાવવાની માંગ કરવામાં આવી હતી. કાર્યવાહક ચીફ જસ્ટિસ મનમોહનની અધ્યક્ષતાવાળી બેન્ચે કહ્યું કે આવી જ એક અરજી ફગાવી દેવામાં આવી છે. કોર્ટે કહ્યું કે, તે મુખ્ય પ્રધાન અરવિંદ કેજરીવાલે નક્કી કરવાનું છે કે તેઓ રાષ્ટ્રીય હિતમાં શું નિર્ણય લે છે. રાષ્ટ્રીય હિતને વ્યક્તિગત હિતથી ઉપર રાખવું જોઈએ.
અરજી હિન્દુ સેના પ્રમુખ વિષ્ણુ ગુપ્તાએ દાખલ: સુનાવણી દરમિયાન કેજરીવાલ તરફથી હાજર રહેલા વરિષ્ઠ વકીલ રાહુલ મહેરાએ કહ્યું કે આ અરજી અગાઉ પાછી ખેંચી લેવી જોઈતી હતી કારણ કે આવી જ અરજી સુરજિત સિંહ યાદવ દ્વારા દાખલ કરવામાં આવી હતી જેને કોર્ટે ફગાવી દીધી હતી. તમને જણાવી દઈએ કે બીજી અરજી હિન્દુ સેના પ્રમુખ વિષ્ણુ ગુપ્તાએ દાખલ કરી હતી. અરજીમાં કહેવામાં આવ્યું હતું કે અરવિંદ કેજરીવાલની મની લોન્ડરિંગ એક્ટ હેઠળ ધરપકડ કરવામાં આવી છે અને તેઓ બંધારણ હેઠળ ગોપનીયતાના ભંગના દોષી છે. બંધારણ મુજબ તેમને હટાવવા જોઈએ.
કેજરીવાલની 21 માર્ચે ધરપકડ કરવામાં આવી હતી: અરજીમાં કહેવામાં આવ્યું છે કે, કેજરીવાલની 21 માર્ચે ધરપકડ કરવામાં આવી હતી અને તે દિવસથી દિલ્હી સરકાર બંધારણની કલમ 154, 162 અને 163નું પાલન કરી રહી નથી. 21 માર્ચથી દિલ્હી સરકારની કેબિનેટની બેઠક મળી નથી જેથી તે લેફ્ટનન્ટ ગવર્નરને સલાહ આપી શકે અને લેફ્ટનન્ટ ગવર્નર તેના પર કોઈ નિર્ણય લઈ શકે.
આ એક્ઝિક્યુટિવનું કામ છે, કોર્ટનું નહીં: 29 માર્ચે દિલ્હી હાઈકોર્ટે આવી જ એક અરજી ફગાવી દીધી હતી. દિલ્હીના કાર્યકારી મુખ્ય ન્યાયાધીશ મનમોહનની અધ્યક્ષતાવાળી બેંચે કહ્યું હતું કે આ કોર્ટનું કામ નથી, કાર્યપાલિકાનું કામ છે. કોર્ટે કહ્યું હતું કે એવો કોઈ કાયદો જણાવો જેમાં મુખ્યમંત્રીને પદ પરથી હટાવવાની જોગવાઈ હોય. કોર્ટે કહ્યું હતું કે જો કોઈ બંધારણીય નિષ્ફળતા હશે તો રાષ્ટ્રપતિ અથવા લેફ્ટનન્ટ ગવર્નર નક્કી કરશે. આ મામલે ન્યાયિક હસ્તક્ષેપને કોઈ અવકાશ નથી.
